Documental ‘Ventiañeros’ de Dixebra (2007)

Nesta entrega del AMCA dixitalizamos el documental Ventiañeros que repasa los primeros venti años de trayectoria de Dixebra. Esta pieza taba incluyía dientro del discu en directo N’Acción, que recoyía’l conciertu XX Aniversariu que dio’l míticu grupu de rock astur.

A piques de cumplir cuatro décades d’actividá ininterrumpida, Dixebra sigue tando mui presente nos escenarios d’Asturies y de fuera. Nel Archivu de la Música Contemporánea Asturiana (AMCA) recuperamos agora’l documental Ventiañeros que s’incluyía nel trabayu mulltidisciplinar col que conmemaroraron el so venti aniversariu; una CD+DVD que publicó Discos L’Aguañaz en 2007 y que yá ta descatalogáu.

Esti álbum titulábase N’Acción y nél recoyíase’l conciertu que dieron na Plaza’l Parche d’Avilés ante 3.000 persones, que naquella cita especial contaba cola collaboración de Dark la eMe, Dani Stylo, Toño Gómez, Xosé Ambás o Los Sidros.

Amás del rexistru n’audiu, ufiertábase tamien un DVD nel que constaba’l conciertu, los videoclips qu’asoleyaren hasta la fecha y una pieza de calter documental titulada Ventiañeros. Esta última taba dirixida pol realizador valdesán Guillermo Fernández, nella contábase la historia de la banda al traviés d’entrevistes colos sos integrantes, que falaben de la so trayectoria, compromisu, ideoloxía… rellatándose tamién anécdotes y socedíos llamativos. Too ello taba intercalao con imáxenes d’actuaciones relevantes, tanto n’Asturies como n’escenarios foranos.