Documentu audiovisual de Remis Ovalle (1972)
Esti documentu audiovisual ye un estractu del programa Raíces, qu’emitió Televisión Española (TVE) y afonda na figura de José Remis Ovalle, ún de los grandes gaiteros de la historia de la música asturiana. Tamién ufrimos una galería con catorce semeyes inédites o poco conocíes.
A José Remis Ovalle (Margolles 1910 – Tornín 1987) l’interés pol mundu del folclor y la música tradicional venía-y per vía familiar, so pá yera conocíu como El Gaiteru Margolles y dio-y les primeres llecciones del instrumentu a los doce años. En 1956 gana’l concursu de Gaiteru Mayor d’Asturies entamáu pol Conceyu de Xixón y fai una xira pel continente americanu, percorriéndolu d’arriba a abaxo nun periodu de tiempu de tres años. En 1970, con dellos discos grabaos, preséntase al concursu entamáu tamién en Xixón pal títulu de Gaiteru Mayor d’España y gánalu, teniendo que competir cola gaita asturiana y la gallega
El documentu audiovisual que presentamos ye un estractu del programa Raíces, qu’emitió Televisión Española (TVE) ente los años 1972 y 1983, dedicáu a recoyer y dar a conocer les costumes y tradiciones (música, baille, artesanía, gastronomía, fiestes, etc.) de los pueblos del Estáu. Manuel Garrido Palacios yera’l so director, realizador, guionista y presentador; en total llegaron a emitise 199 capítulos, siendo’l de la entrevista con Remis Ovalle (que tamién tocaba’l vigulín y el tambor) ún de los primeros, nel qu’interpreta un par de pieces, una d’elles el so famosu Floréu.
Ufiertamos tamién una serie de semeyes poco conocíes o inédites que son un resume de la carrera de quien ta consideráu ún de los gaiteros míticos del país.
