La Tarrancha cellebra cuasi 20 años de trayectoria con un conciertu especial en L.lena
En 2023 el grupu fusión La Tarrancha va cumplir dos décades enriba los escenarios. Pa dir calentando l’aniversariu, el grupu va zarrar la xira de conciertos del 2022 con un conciertu mui especial baxo’l nome Camín de Venti. Va ser el 19 de payares a les 19h nel Teatru Vital Aza de La Pola (L.lena) y nél van cuntar con más de diez collaboraciones d’amigos y músicos que tienen participao cola banda a lo llargo estos venti años. Amás, l’espectáculu va grabase.
«Venti años dan pa muncho y pa poco. Hebo mil anécdotes, kilómetros de carretera, penes, allegríes, seis discos, compilatorios con canciones especifiques pa ellos, cenciellos… y sobre too munches amigues y amigos nel camín», comenta Delfín Valdés, vocalista del grupu. Por eso pal conciertu Camín del Venti van cuntar «con una parte de la familia de músicos tarrancheros».
Ente les collaboraciones confirmaes tán Nano, guitarrista excomponente y fundaor de la banda, conocíu por formar parte de grandes bandes punk de los 90-; Simón San José, percusionista y luthier que también foi batería de La Tarrancha-; Carlos García Villamil, guitarrista de Skontra que dende va un tiempu ye guitarrista suplente en La Tarrancha; Paco Calero, actualmente en Gemtonics y Bindy Bazaar. que ye un ye un tarranchasuplente, nel so casu al baxu; Dani Valdés, batería actual de La Mueska y como suplente en La Tarrancha; Dani Álvarez. Conocíu multiiinstrumentista nel mundu folk y habitual collaboraor de La Tarrancha a les flautes, buzuki y gaita; Nel de Purnea, baxista y guitarrista que forma parte de Vrienden o pasó per bandes como Muñeco Vudu, tamién foi baxista suplente un tiempu en La Tarrancha; Nico Braña. músicu gozoniegu que toca anguaño en Voodoo Grass y va acompañar a la mandolina, como ya lo fexo nel últimu single de la banda Tiempu de sidra y roses; y gaiteros y percusionistes de la Banda Gaites Villaviciosa, que yá collaboraron con La Tarrancha tanto n’estudiu como en directo.
Grabación en directo
«El Teatru Vital Aza de mano paez un llugar un poco raru pa un conciertu d’una banda baillable de principiu a fin, pero en realidá, ye’l llugar ideal pa una gala llena de collaboraciones y calor fraternal», sorraya Valdés. Amás, el vocalista destaca que’l conciertu va grabase «nun principiu, pa tener constancia del momentu, anque nun se descarta asoleyar de dalguna forma’l material, yá sea peles redes o en formatu físicu». El sábadu 19 a les 19h y con entrada de baldre va poder disfrutase d’esti Camín de Venti, conciertu financiáu pola Conceyalía de Cultura de L.lena y Asturies Cultura en Rede.
