Slum Suit y Mostru l’Horru zarraron la cuarta temporada d’Amosando

El grupu de jazz de raigañu Slum Suit y el dúu de hip hop Mostru l’Horru foron les dos bandes encargaes de zarrar el domingu 23 d’ochobre la edición 2022 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique. Nesta cuarta temporada -que foi grabada dafechu en Les Naves d’El Natahoyo y na que namás pudo asistir de públicu xente asociao a L’Ensame de Musicasturiana.com-, tamién participaron en mayu Baxel pa presentar ‘El Cantar del Simpatías’ y Algaire p’amosar ‘Coral y Maera’.

Javi Lueje grabando l’actuación de Slum Suit

A les doce del mediudía abrieron el conciertu Slum Suit, banda de jazz de raigañu que trabaya cola música popular asturiana amestándola a armoníes jazz y na que la improvisación xuega un papel per importante. El proyecto formólu en 2017 el gaiteru y saxofonista carbayón Carlos Casado, cuando taba emigráu a Nueva York, y en 2019 afitó’l grupu n’Asturies. La Casa Vieya’ ye’l so tercer EP, nel qu’anoven el so soníu y incorporen al grupu a veteranos de la escena jazzística astur.

Eva Díaz Toca, una de les bateristes más reputaes d’Asturies
Xaime Arias a los teclaos, Carlos Casado al saxu y Óscar Santos al baxu

Dempués llegó’l turnu de Mostru l’Horru que, tovía cola resaca de concursar na final del XIV Premiu Camaretá al meyor cantar, descargaron el so hip hop combativu n’asturianu. El Mostru y el productor llangreanu Zeros formen esti dúu creáu en 2021 que va unes selmanes asoleyó’l so primer trabayu ‘Señales de Fumu, un discu rap d’ocho cantares nel que tamién suenen influyencies d’otros estilos como’l reggae o’l rock.

Mostru l’Horru son anguaño l’únicu grupu de rap n’asturianu

El públicu asistente pudo disfrutar d’un conciertu especial, nel que se llendó l’aforu a una decena de persones y nun espaciu bien distintu y underground como son Les Naves d’El Natahoyo. Tamién hubo tiempu pa que la xente pudiera aldericar colos grupos dende la cercanía, mercar los sos trabayos discográficos y hasta que los artistes-yos los dediquen cola so firma. Precisamente, esta cercanía y interacción ente grupos y públicu ye una de les característiques d’esti formatu únicu n’Asturies.

Xicu Ariza, responsable de musicasturiana.com, presentando a los grupos

Cuatro años y 20 artistes

Amosando nació en marzu de 2019 a idea de la plataforma musicasturiana.com. Nesti tiempu tocaron otros 20 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel y Algaire. La suma de los videos de los conciertos algama más de 200.000 reproducciones en YouTube.

Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje, Rubén Álvarez y David Varela, patrocinada nesta edición por Fundación Caja Rural de Asturias, cola collaboración de Fuensanta y Santa Cerveza y subvencionada pola Fundación Municipal de Cultura y Educación de Gijón/Xixón.

*Semeyes de David Varela.

Mercar discos de Slum Suit y Mostru l’Horru

Dexa un comentariu

X