Yá ta abierta una convocatoria d’Asturies Cultura en Rede, el circuitu qu’entama la Sociedá Pública de Xestión y Promoción Turística y Cultural del Principáu d’Asturies pa promover a lo llargo de los conceyos del país eventos musicales, de cultura tradicional, d’artes escéniques, de lliteratura y pa conmemorar el Xacobéu. Hasta’l 12 de payares ta abierta esta nueva convocatoria pa la selección de proyectos y ellaboración de catálogos que valgan como base pa la programación posterior en sales o espacios culturales durante’l primer semestre del 2022.
Sicasí, pa poder participar nel circuitu de Música y Artes Escéniques ye necesario que los proyectos tean inscritos a traviés del Catálogu de l’Actividá escénica y musical asturiana enantes del 31 d’ochobre a les 23:59, como indica la publicación nel BOPA referente a esti tema.
Un añu de circuitu
N’ochobre del añu pasáu presentábase «Asturies Cultura en Rede«, el programa del Gobiernu del Principáu d’Asturies pa poner en marcha un circuitu cultural pelos distintos conceyos del país. La música y la cultura tradicional formen parte de la programación, amás de les artes escéniques, la lliteratura, el cine, les artes visuales y delles actividaes especiales coincidiendo col Xacobéu.
Nesti 2021, fueron más de 100 los conciertos que se programaron en más de 30 conceyos y la Sociedá Pública de Xestión y Promoción Turística y Cultural d’Asturies -responsable del circuitu- yá presentó toles actividaes hasta final d’añu, ente les que se pue cuntar más de 30 conciertos nos que la música n’asturianu ye protagonista.
L’axenda completa de toles actividaes pue consultase na web d’Asturies Cultura en Rede y la información sobre los conciertos d’artistes y agrupaciones que trabayen col asturianu como llingua vehicular ta disponible tamién n’axenda de musicasturiana.com.
Suscríbite a les nuestres novedaes
