Tres del surdimientu a primeros d’añu de Cuévano, la escena folk suma un nome nuevu, Fayéu. Esti proyectu comparte lletrista y alma máter, Iván Testón, y naz a iniciativa del xoven gaiteru Pablo del Cuadro, quien propunxo a Testón entamar un proyectu nuevu. «Asina ye como empezamos a xuntar varios multiinstrumentistes y a completar con xente de fuera lo que teníemos», desplica Testón sobre esta formación nueva de música de raigañu.
Los nueve componentes que formen el grupu son Mónica Sánchez (voces), Nel Cortizo (flauta, gaita, percusiones), Pablo del Cuadro (gaita, whistle), Diego Fernández (vigulín, uilleann pipe), Lluci Arias (teclaos, vigulin, percusiones, coros), Nacho Narciandi (percusiones), Imanol Rimada (banjo), Andrés García (guitarra) y el mentáu Iván Testón a les lletres y coordinación.
El primer tema que van grabar titúlase ‘Fayéu’, como la propia formación, y el grupu va rexistralu nos Estudios Kathedrale. Amás la banda yá ta trabayando nel so conciertu presentación, que va ser el 30 d’ochobre na Taberna Cuévano de Siero. Col surdimientu de Fayéu la escena folk sigue sumando propuestes nueves nun momentu de gran vitalidá y dinamismu.
Suscríbite a les nuestres novedaes
