6 Riales y Antón Menchaca zarraron la quinta temporada d’Amosando

La música tradicional de 6 Riales y la post-tonada d’Antón Menchaca foron les encargaes de zarrar el vienres 17 de payares la edición 2023 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique.

A les seis de la tarde abrieron el conciertu 6 Riales, el tríu de música tradicional formáu por Elisabeth Montequín, Alba Menéndez y Natalia Riestra. Presentaron el so primer trabayu Sutripar, un álbum formáu por pieces populares y de composición propia inspiraes na tradición. Nelles, dellos instrumentos de percusión -panderetes, panderos, cuyares, llata pimentón…- son los que ponen ritmu a xotes, muñeires, pasudobles y otros sones populares..

Dempués llegó’l turnu d’Antón Menchaca. El dúu formáu pola mierense Belen Antón a la voz y el guitarrista xixonés Pedro Menchaca presentó’l so segundu discu Los díes contaos. Añaes, vaqueires, tonaes… sonaron nes pieces qu’interpretó esta formación que lleva a la canción asturiana a nueves sonoridaes esperimentales. D’esta manera, renueven el xéneru como yá lo ficieron n’otres décades pioneres como Obdulia Álvarez La Busdonga, Diamantina Rodríguez o Mariluz Cristóbal Caunedo.

El públicu asistente pudo disfrutar d’un conciertu especial, nel que se llendó l’aforu a una decena de persones y nun espaciu bien distintu y underground como son Les Naves d’El Natahoyo. Tamién hubo tiempu pa que la xente pudiera aldericar colos grupos dende la cercanía, mercar los sos trabayos discográficos y hasta que los artistes-yos los dediquen cola so firma. Precisamente, esta cercanía y interacción ente grupos y públicu ye una de les característiques d’esti formatu únicu n’Asturies.

Cinco ediciones y 24 artistes

Amosando nació en marzu de 2019 a idea de la plataforma musicasturiana.com. Nesti tiempu tocaron 22 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru, Slum Suit, La Garrapiella y La Bonturné. La suma de los videos de los conciertos algama más de 200.000 reproducciones en YouTube.

Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, grabada y realizada audiovisualmente por Javi Lueje, Rubén Álvarez, David Varela y Rubén Arena y subvencionada pola Fundación Municipal de Cultura y Educación de Gijón/Xixón.

Mercar discos