Susana de la Cruz Rodríguez (L’Habana, 1984) ye gaitera y cubana. Anguaño vive n’Asturies y investiga cola beca «Severo Ochoa» nel Programa Oficial de Doctoráu na Universidá d’Uviéu dende va cinco años, dempués d’algamar el títulu de Master de Profesoráu pola especialidá de Música mientres se graduaba, tamién, nel Conservatoriu Profesional d’Uviéu como gaitera. Anque aportó a Asturies dafechu en 2018, el so venceyu pa cola música asturiana vien de muncho enantes, de cuando moza, nel contestu de la Federación d’Asociaciones Asturianes del so país. «Allá» en L’Habana estudió tamién Diseñu y Flauta na Universidá de les Artes, y foi profesora de la Escuela Nacional d’Arte. Como docente, pon clase nes asignatures d’Etnomusicoloxía y Patrimoniu Musical Español y Iberoamericanu nel grau de Musicoloxía de la Universidá d’Uviéu.
Amás de la so induldable y almirable esperiencia nel ámbitu académicu, tien un bagaxe ablucante como intérprete de música clásica y antigua y, no tocante a la música tradicional, tien munchu oficiu de gaitera. Formó parte d’una agrupación en Cuba dende los entamos -más tarde la dirixó- y, equí n’Asturies, toca davezu na Banda Gaites Camín de Fierro, la Banda Gaites Xiranda y la Xiranda Brass Band, y toca pal baille nel GBT de Fitoria.
El próximu domingu 9 va ser la encargada d’abrir l’actu del Conceyu de la Gaita pol día internacional del instrumentu a les 10.30h cola conferencia La presencia de la gaita en Cuba, una esbilla de la so investigación doctoral sobre la representación de la gaita nes músiques populares que conformaron la identidá musical de la so tierra. Asoleyamos esta entrevista aprovechando esta cita pa conocer dende cerca la so esperiencia vital, académica y musical dende los sos entamos como gaitera en L’Habana hasta los sos últimos llogros equí n’Asturies, faciendo delles paraes nel contestu de la migración asturiana en Cuba, la colectividá asturiana más alló del atlánticu, la práctica musical tradicional na diáspora, la so faceta como investigadora y muncho más.
¿Cuándo y en qué contestu entamó la to rellación cola música asturiana?
Nel añu 2003 incorporéme a les clases de gaita que s’impartíen na Federación d’Asociaciones Asturianes de Cuba, un sitiu qu’ocupaba l’edificiu del antiguu Habana Club, cerca del que fuera’l Palaciu Social llevantáu en 1927 y qu’ocupó dende esa fecha’l Centru Asturianu de L’Habana (1886) nel Parque Central. Daquella yera estudiante de Comunicación Audiovisual -Diseñu Gráficu- na Universidá del Diseñu en Cuba (ISDi), enantes Institutu Superior de Diseñu, del que me gradué en 2007.
Nos años 90 en Cuba, cola cayida del campu socialista, entamó pa la isla una crisis económica aguda conocida como Periodu Especial. Nesi tiempu, acceder a la formación musical reglada yera prácticamente imposible y, anque tres el triunfu de la Revolución de Fidel Castro (1959) estos centros asociativos foron interveníos y desarticulaos pol gobiernu -y con ellos, la so cultura-, una vuelta pa fortalecer les rellaciones cola antigua metrópoli y hacia l’antigua colonia dende Cuba y España, foi la ocasión que tornó a afitar dende los 90 la cultura del asociacionismu español en Cuba. La isla foi’l destín principal de recepción de migrantes asturianos na etapa d’emigración masiva (1880-1930) y segundu destín de la emigración gallega a les Amériques -dempués d’Arxentina-, siendo Cuba, sicasí, l’espaciu onde los gallegos patentizaron los sos signos d’identidá -Himnu gallegu, Real Academia Gallega, etc.-.
Ye por too esto que dende los 90 vuelven a entrar en Cuba les acciones de los gobiernos autonómicos del norte peninsular y con ello la gaita, que cuasique se perdiera ente 1959 y 1990. Nes asociaciones d’esti tipu entamaron a ponese clases reglaes de gaita y baille tradicional, un paliativu cultural a la crisis que yá vivía la isla. Hacia’l centru de les asociaciones entama a averase muncha xente mozo, descendientes o non, qu’alcuentren nelles una forma de facer y deprender música. Esi foi’l mio casu.
«Dende los 90 volvió a entrar la gaita en Cuba. Nes asociaciones de migrantes asturianos entamaron a ponese clases reglaes y averóse muncha xente mozo, descendientes o non, qu’alcontraron nelles una forma de facer y deprender música»
Concretando un poco más, ¿cuál foi’l to percorríu cola gaita, primero na to tierra y, dempués, n’Asturies?
Na Federación d’Asociaciones Asturianes de Cuba entamé a deprender a tocar la gaita asturiana col profesor Arturo Miguel Pérez Quintana, un mozu que yera saxofonista y gaiteru, y que deprendiera, igualmente, de los mozos d’una agrupación creada nos 90 como resultáu d’esa apertura cultural que te comento: l’Andecha Folklore Asturiana de L’Habana. Entós, nel añu 2003 empezamos coles clases, namás un par de xóvenes, y bien llueu foron sumándose otros más. Daquella teníemos les gaites vieyes de l’Andecha, armaes a retazos y con fuelles de cabritu na calor del Caribe cubanu; malpenes 2 o 3 gaites qu’alternábemos cada sábadu nos ensayos. Nun yera como equí, que puedes tener un instrumentu pa ti y estudiar en casa; namás tocábemos un poco los sábados y dempués practicábemos cola flauta.
La gaita asturiana, mesmo que cualesquier otru instrumentu musical, precisa esa formación paralela, dende’l mio puntu de vista imprescindible, d’estudios formales de solféu y música en xeneral. Per ehí conocí y pudi entrar al últimu conservatoriu p’adultos que quedaba en L’Habana, nel Centru de Superación pa la Cultura Félix Varela, onde s’impartía formación académica reglada p’aquellos músicos adultos aficionaos que queríen formase y algamar una titulación. Nel mio casu, fici ehí mientres varios años estudios de nivel elemental y mediu profesional de Flauta travesera col profesor Alfredo Portela López -aproximadamente ente 2003 y 2010-.
Al mesmu tiempu, incorporéme a los talleres y al programa académicu qu’empecipió nesos años el Conxuntu de Música Antigua Ars Longa, baxo la dirección de Teresa Paz y Aland López, na Oficina del Historiador de la Ciudá; primero, col flautista Daniel Bernazay y, dempués, cola profesora Claudia Gerauer. Ente 2013 y 2017 fici’l grau superior en Flauta na Universidá de les Artes (ISA) de Cuba, col profesor Raúl Valdés y dientro d’un programa cola Fundación Hanns Seidel (HSS) onde recibí formación regular académica en flauta de picu con Claudia Gerauer de la Hochschule für katholische Kirchenmusik und Musikpädagogik Regensburg, graduándome con esti instrumentu. Como resultáu d’esi programa, fui profesora del conservatoriu Escuela Nacional de Música per siete años.
Mientres too esto pasaba, el nuestru pequeñu grupu de 2-3 gaites foi medrando, incorporando percusión y recibiendo gaites dende Asturies; ensin gaites nun hai gaiteros. De la Dirección Xeneral d’Emigración del Gobiernu del Principáu d’Asturies unviaron materiales y bibliografía. Los cursos d’estensión de la Escuela d’Asturianía foron vitales pa la nuestra agrupación, especialmente en Cuba, que ta tan aislada del mundu y d’otres colectividaes d’América. Teníemos el Dayures na biblioteca de la Federación como referencia única y dixitalizamos los sos casettes. Orientáronnos tamién los trabayadores sociales Ana y Jose, que trabayaben colos mayores en Cuba. Nun teníemos internet y l’accesu, entá anguaño, ye bastante restrinxíu.
Ehí conocimos a Flavio Benito, que foi’l profesor de gaita qu’impartió los cursos d’estensión en delles ocasiones: ente avientu y xineru de 2005-2006, y al rodiu de 2008. Dende Cuba, Arturo facía un llabor de munchu méritu, yo encargábame del grupu de neños. Tamién participaron otros profesores como Pedro Pangua y Fernando de la Puente, y tuvimos la visita puntual de delles agrupaciones como Xaréu d’Ochobre, la banda gaites de Xuacu amieva, el Coro La Flor, etc. Flavio caltuvo’l contactu dende la distancia, apurriéndonos materiales, partitures, música grabada, y poniéndonos al tantu de los que se facía n’Asturies y n’otros sitios d’América.
En 2008 fuimos a tocar con Carlos Núñez nel Celtic Colors International Festival de Cape Breton en Canadá; ficimos desfiles y pasucáis per L’Habana Vieya y nel Centru Históricu; facíemos un desfile de San Patricio anualmente, tocamos dellos años cada selmana na ceremonia del Cañonazu de les 21h coles Fuerces Armaes na Fortaleza de la Cabaña -un espectáculu fechu tradición dende’l sieglu XVIII onde se dispara un cañón qu’indica’l pieslle de les muralles de la vieya Habana-; los festivales de la Feria del Tabacu en Cuba; y, por supuesto, les actividaes asociatives asturianes, la selmana de la cultura asturiana pol 8 de setiembre y nel asilu de Santovenia nel Cerru; asina como les actividaes de la colonia española en Cuba en xeneral, como’l Festival de la Huella de España. Seguíemos ensayando cada sábadu y quedábemos los miércoles pa estudiar: un procesu preciosu, dafechamente altruista nun contestu nada amable, onde nos enseñábemos unos a otros, los que yá sabíemos lleer partitures y los nuevos que s’incorporaben.
Ente 2015 y 2017 vini a Asturies a la Escuela d’Asturianía. Yá participara nesti proyectu’l nuestru director Arturo M. Pérez y Jordanka Juanes de la nuestra banda, dende la colectividá d’Arxentina.
Ye significativo apuntar que yá sobre 2011, más menos, tábemos fuera de la Federación d’Asociaciones Asturianes de Cuba, que, énte la posibilidá d’alquilar el so espaciu físicu pa hostelería, decidió que los gaiteros sobrábemos nel edificiu, que yá nun podíemos usar pa ensayar nin un par d’hores los sábados. Alquilaron tolos espacios a pequeños particulares, vaciaron y tiraron los archivos y el patrimoniu asturianu, y namás caltuvieron el nome pa los sos restaurantes privaos. Una vergoña total que conoz el Principáu. Lo que m’entrugo ye: ¿hasta cuándo va ser asina?
Los gaiteros, qu’entós llamábemonos Banda de Gaitas Asturianas de La Habana, nomámonos Gaiteros del Malecón porque’l malecón habaneru acoyónos informalmente pa facer ensayos al aire llibre y, yá sabes, esto ye «hasta que se seque el malecón».
Foi n’Asturies onde conocí al mio home, el tamboriteru y gaiteru Arsenio Ruiz y, anque nos casamos en L’Habana en 2017, vinimos pa Uviéu. Vivo equí dende 2018. Dende l’añu 2016, qu’emigró a los Estaos Xuníos Arturo M. Pérez, tuve a cargu de la banda un par d’años. N’emigrando yo, quedó al frente la clarinetista y gaitera Yelianys Noy. En 2016 recibimos una dotación de gaites asturianes de José Ángel Hevia y Liberbank, gaiteru que tuvo mui pendiente de los escoyos de la nuestra agrupación; Arturo M. Pérez participó como arreglista en cinco de les igües musicales d’Al son del Indiano.
«En 2011, la mio agrupación taba fuera de la Federación d’Asociaciones Asturianes de Cuba porque decidió alquilar tolos sos espacios físicos a particulares pa hostelería, vaciar y tirar los archivos y el patrimoniu asturianu»
Va dellos años algamasti’l títulu de Grau Profesional de Gaita nel Conservatoriu d’Uviéu, pero yá te graduares como flautera na Universidá de les Artes de L’Habana y teníes una fonda esperiencia na educación musical d’ellí, ¿qué diferencies esperimentasti ente dambos sistemes?
Tando n’Asturies, incorporéme a clases col profesor Balbino Menéndez de la Escuela de Música Tradicional del Conceyu d’Uviéu, a quien conocí nel últimu añu que cursaba na Escuela d’Asturianía. Entré na agrupación que dirixía daquella, la Banda Gaites Camín de Fierro y, amás, nel Grupu de Baille Tradicional de Fitoria y na Banda de Gaites Xiranda.
El que fuera’l nuestru formador, Flavio, taba poniendo clases nel Conservatoriu Profesional d’Uviéu. Foi por él que conocí la posibilidá de facer les pruebes d’accesu a sestu cursu de gaita, teniendo en cuenta la mio formación precedente en L’Habana, y mesmo Arsenio como yo preparamos los esámenes. Mientres, diba cursando’l Máster en Formación del Profesoráu, especialidá de Música, na Facultá de Profesoráu de la Universidá d’Uviéu.
Hai munches semeyances ente lo qu’estudié en Cuba y los materiales de les asignatures que cursé nel sestu cursu del Conservatoriu Profesional, polo que personalmente l’esfuerciu concentrélu en deprender los repertorios, la cultura y les técniques d’execución y interpretación de la gaita asturiana, los sos espacios y usos.
A diferencia de Cuba, equí tienen ventayes enormes no tocante al accesu a los materiales d’estudiu: llibros, partitures y, sobre too, ¡l’instrumentu!; a Internet y a les biblioteques dixitales y físiques de tou tipu, a modalidaes estremaes d’estudiu flexibles… Esto nun país como Cuba nun esiste. Tamién a acceder de manera directa, mediante un esame de suficiencia nes asignatures correspondientes, a un cursu determináu, o a escoyer determinaes asignatures del currículum y configurar, personalizar -dientro de ciertes llendes, por supuesto- los estudios y les materies en función de los intereses del alumnáu y de les sos responsabilidaes individuales -yá seya por combinar la formación musical académica con otros estudios o col trabayu, yá seyan más mozos o más mayores-.
En Cuba, l’estudiu de la música ta venceyáu a la formación escolar. A les carreres llargues como pianu y cuerdes frotaes accédese cuando’l neñu tien 7 años; a les menos llargues, como vientos o cuerdes pulsaes, con 9 años. Separen a la reciella de la so escuela habitual -intérnenlos incluso mientres la selmana a esa curtia edá- y van a un conservatoriu onde s’imparte la docencia obligatoria formal nuna sesión y, na otra, la formación musical.
Ye una decisión que tomen tos padres d’alcuerdu a les sos posibilidaes reales d’acceder a un instrumentu musical y de llevate cada día a un conservatoriu -que, na mayoría de los casos, ta n’otru sitiu a onde vives-, y a una formación previa particular -privada, de tipu informal- pa preparar los esámenes d’accesu y los de continuidá. Poro, la formación musical académica nun ye pa tol mundu, nin pa tolos neños con talentu y deseos d’estudiar música; normalmente son los fíos de les families de músicos los qu’entren nos conservatorios -qu’abren mui poques places-, los fíos de families con «otres y meyores» posibilidaes adquisitives, o los neños que coincide que tienen na so zona’l conservatoriu de referencia del so ámbitu xeográficu. Recordemos qu’en Cuba cuasi nenguna familia obrera tien accesu a un coche particular y el tresporte públicu ye una calamidá: desplazase en Cuba ye un asuntu seriu. Cuando’l neñu se desfasa o aporta a la mocedá o adultez, yá nun pue incorporase a esi circuitu.
Esa posibilidá pa min nun esistió, nin siquiera la convocatoria, ye dicir, nin la posibilidá d’acceder, como pa munchos xóvenes como yo. Puedo dicir que tuvi muncha suerte d’acceder al últimu conservatoriu p’adultos que quedaba en L’Habana, una suerte de coincidencies topar al profesor perfectu nel momentu xustu, el flautista -yá fináu- Alfredo Portela.
«En Cuba, l’estudiu de la música ta venceyáu a la formación escolar. Cuando aportes a la mocedá o adultez, yá nun pues incorporate a esi circuitu. Esa posibilidá pa min nun esistió, como pa munchos xóvenes como yo. Tuve muncha suerte d’acceder al últimu conservatoriu p’adultos en L’Habana»
Nesi sen, anque nuna bayura de países europeos y n’otros d’América Latina como Cuba la educación musical superior reglada ta dientro de les universidaes, equí nel Estáu español nun acaben de vese avances y sigue habiendo munches torgues y resistencies, ¿cómo lo valores tu: pienses que habría facese esi cambiu? ¿En qué aspectos ameyoraría o empeoraría la docencia y la situación del alumnáu?
Creo que nel casu d’España, sería una ventaya que los equí nomaos Estudios Superiores non Universitarios que se realicen nos Conservatorios s’afitaren dientro d’una Universidá de les Artes como ye’l casu de Cuba y, como comentes, de munchos países. Nesi sen, considero que na isla ta meyor organizao. Ellí, por exemplu, na Universidá de les Artes comparten el mesmu espaciu físicu, menos nel casu d’Audiovisuales, los estudios de música -Interpretación, Musicoloxía y Formación Pedagóxica Musical-, artes visuales, danza, actuación, etc. D’esa manera, l’estudiante de flauta cursa materies colos de Musicoloxía, comparten profesoráu, y incluso tienen cercanía col trabayu de los estudiantes de pintura, danza, teatru, dramaturxa, etc. Esta convivencia xenera proyectos en común ente l’alumnáu y ye muncho más arriquecedora. Amás, en Cuba, l’estudiante qu’accede al grau en Musicoloxía tien que tener fecho’l nivel mediu profesional en Música, de manera que la práctica musical nun-y paez ayeno.
Per otru llau, una dificultá que topé equí foi l’accesu al Máster de Formación del Profesoráu. De Cuba traxi los mios dos graos llegalizaos -Diseñu y Música-, colo que pudi acceder a les pre-matrícules; de fechu, seleccionáronme pola titulación de Diseñu primero, pa la especialidá de Debuxu, quedando la primera na llista d’espera de Música. De cara a la matrícula, la llista movióse y pudi cursar el Máster na especialidá de Música como quería, y, conmigo, otros dos compañeros d’Interpretación. Sicasí, l’accesu a esti Máster prioriza a los graduaos de Musicoloxía sobre los graduaos de Conservatoriu Superior de manera qu’un estudiante con menos calificaciones, namás por tener cursao Musicoloxía, tien preferencia p’acceder énte un estudiante con meyores calificaciones n’Interpretación del Conservatoriu Superior de Música. La gran contradicción ye que la pedagoxía anímanos a les metodoloxíes actives, onde la propia práctica musical ye un gran recursu a favor. Esto, amás de la desigualdá obvia, ye incoherente col desendolcu del Máster. Creo entender que nun tener estes enseñances dientro del espaciu universitariu ye lo que xenera esta atrocidá, circunstancia que dempués s’espeya na clase de música de la Educación Secundaria.
«Sería una ventaya que los Estudios Superiores de los conservatorios s’afitaren dientro d’una Universidá de les Artes como en Cuba. La situación d’anguaño xenera, amás de la desigualdá obvia, circunstancies que s’espeyen nes clases de música de la ESO»
Anguaño tas cursando los estudios de Doctoráu na Universidá d’Uviéu, ¿sobre qué tas investigando? ¿Cómo ta siendo la esperiencia?
Nel propiu Máster de Profesoráu tuvi de docentes de la especialidá de música a los doctores Julio Ogas y Marcela González, una esperiencia arriquecedora, un exemplu de profesores implicaos. Julio foi’l mio tutor nel Trabayu de Fin de Máster y con quien indagué sobre la posibilidá de continuar estudios de Doctoráu. Anguaño ye’l mio director de tesis y forma parte del grupu d’Investigación en Música Contemporánea d’España y Llatinoamérica y, nel casu del nuestru estudiu, desendolcó un llabor d’investigación sobre la música de la emigración gallega a Arxentina.
Investigo baxo’l títulu La gaita y la música asturiana y gallega en Cuba. Espacios culturales y transculturación sonora na Universidá d’Uviéu y con apoyu del Gobiernu del Principáu d’Asturies al traviés del so Programa d’Ayudes “Severo Ochoa” pa la Investigación y Docencia.
Esti tema resultó como una continuidá del TFM del máster, que tamién tuvo vinculáu a la gaita –Los espacios geográfico culturales de la gaita. Una experiencia multicultural en el aula– y de la mio esperiencia de vida musical. Munches veces entrugámonos en L’Habana: ¿por qué tocamos la gaita, quiénes nos antecedieron, esistieron gaiteros en Cuba o esto montáronselo los amigos de los Meliá y Iberoestar de los 90 a los que, por cierto, nun podíemos siquiera entrar? Con tantos descendientes d’españoles qu’hai en Cuba, con tantes persones mayores asociaes, ¿nun habría por casualidá dalgún gaiteru o gaitera? Si fuere asina, ¿quién yeren, cuálos foron los espacios culturales onde desarrollaron la so actividá musical?
La esperiencia ta siendo reveladora. Plantegámonos esta investigación, de la que nun esisten antecedentes, dende’l sieglu XX; por contra, alcontramos na etapa colonial la representación del elementu identitariu asturianu o gallegu dende’l propiu procesu independentista cubanu en 1868, representando a la unidá española: Cuadonga como gloria nacional de la reconquista española en Cuba, ente esos opuestos que representen, per un llau, la tradición ancestral qu’otorga connotaciones de valor, y, per otru, a la modernidá que suponía la independencia de Cuba y el nacimientu d’una república en búsqueda de la so identidá. Dempués de la instauración de la República de Cuba en 1902, como efectu decolonial, la imaxe nacionalista tresformóse con una fuerza esceicional nuna corriente rexonalista que quería plantegase como «otra cosa» distinta, ocupando un espaciu significativu dientro de la naciente república cubana. Una tresformación na que les élites hexemóniques cambiaron el traxe colonial a neocolonial, consecuencia que detonó na ruptura col nuevu réxime de 1959; aquel que seleccionó, configuró y determinó lo que debía nomase «cultura cubana», apartando los referentes hispánicos d’asturianos y gallegos en Cuba que, dende ún o otru propósitu, conformen la nuestra identidá nacional.
Darréu de 1990, determinaos mandos políticos situaron la gaita en Cuba, una aparente reconciliación que nun se concreta dientro de la censura cultural y musical de Cuba, nesi pulsu simbólicu de construyir y reinventar identidaes, efectu de los nacionalismos d’ún y otru llau. Como vemos, un instrumentu musical y un instrumentista que la so representación ta dafechamente amestada a lo político onde funcionen, en mediu, los sos espacios de representación y los emigraos que, mesmo como pasa agora colos que venimos a España, buscamos un espaciu humanu de recepción.
«La esperiencia de la investigación ta siendo reveladora. Esisten antecedentes de la representación identitaria asturiana y gallega en Cuba dende’l procesu independentista en 1868»
Los Centros Asturianos foron y siguen siendo un esponente perimportante pa la difusión y práctica de la música tradicional asturiana na diáspora. Tu mesma participasti en dellos programes d’intercambiu y enseñu coles instituciones asturianes cuando entá vivíes en Cuba, pero ¿cómo ye’l contactu de los Centros cola música asturiana d’anguaño? ¿Sedría posible facer convenios pa fomentar estes conexones y que les formaciones asturianes xiraren per Cuba y otros países d’América Latina?
Los Centros Asturianos foron, por supuesto, esenciales pa tresmitir la cultura asturiana, sobre too na diáspora. Siendo mesmamente nel esterior onde s’enfatiza la tresmisión cultural como estratexa del propiu colectivu migrante pa dixebrase y caltenese: definir les sos propies fronteres identitaries énte la propia sociedá d’acoyida y otres presentes, incidiendo nos sos rasgos propios pa reforciar la so visibilidá, en primer instancia; y en segunda, l’énfasis radicó na reinterpretación, redefinición y invención de les tradiciones propies afitando un sistema cultural nuevu distintu al d’orixe, que se caltuvo nel tiempu y foi cambiando y tresformando los sos marcadores culturales.
Nel casu de Cuba, ye una situación de contestu y intereses de dambes partes; sedría abondo con fomentar eses conexones al traviés de convenios o programes que seyan interesantes p’Asturies, como asocedió nel contestu de los 90 y los vínculos comerciales resultantes. Mover tou un aparatu cultural requier recursos económicos a disposición y eso taría en función de les prioridaes, otra vuelta, de les estructures dominantes.
Na to ponencia nel Día Internacional de la Gaita vas falar, precisamente, sobre la presencia de la gaita nes músiques populares cubanes ente 1868 y 2008, ¿qué pues avanzanos d’ella?
Como te comentaba, ye un estudiu sobre la representación de la música con usu de la gaita asturiana y gallega en Cuba, como parte de les músiques populares que conformaron la identidá de la música cubana. Esti trabayu abarca’l periodu comprendíu ente 1868 a 2008, al traviés de la reconstrucción de la gaita y el gaiteru como símbolos culturales que, mientres les etapes históriques distintes, asociáronse a una corriente política que-yos garantizó la so popularidá, desendolcu, censura y, finalmente, «reconciliación».
Falando de la mestura de músiques y estilos, la selmana pasada, Forma Antiqva asoleyaron De sópitu, un discu que revisita y reconstrúi melodíes y cantares tradicionales con instrumentación y estilu barrocos. Dende la to esperiencia nel ámbitu de la Música Antigua, ¿qué característiques de la práctica histórica crees que puen aplicase a la interpretación de la música tradicional?
La práctica histórica o la corriente d’interpretación históricamente informada de la música ye una visión d’interpretación que quier averase lo más fielmente posible a cómo pudo ser interpretada tal práctica. Dende la llectura de la partitura nuna edición histórica, l’afinación de la época y les rellaciones d’altures ente los soníos, la propia técnica de construcción históricamente informada, la técnica d’interpretación -conxuntu d’articulaciones, dicción, afectos, etc-; una cuestión de contestu cultural, d’espaciu d’interpretación y cultura temporal de realización, onde’l paisaxe sonoru yera distintu al d’anguaño. A la fin, cómo podemos averanos a cómo sonaba o baxo qué xuicios estéticos foi valoráu tal fechu musical d’antaño. Dientro del movimientu esisten matices de tou tipu, unos más «historicistes» y otros dende la interpretación histórica, dialogando cola modernidá y otres artes.
No que cinca a la gaita asturiana, vense dellos caminos: unu qu’empatiza col movimientu de Música Antigua, situándose nun tipu de gaita asturiana y la so interpretación; los que transiten n’emparentarla coles gaites de procedencia escocesa, incorporando roncones y esplorando les nueves tonalidaes; otros céntrense n’ubicala hacia’l formatu orquestal y sinfónicu, con un pianu de cola a la mandrecha; o en versión electrónica, modificando timbres y ofreciendo dinámiques musicales. Muncho queda por trabayar al rodiu de les posibilidaes qu’ufre la lutería y les búsquedes de los intérpretes.
Dende’l mio puntu de vista, tou camín d’esploración al rodiu la gaita paezme válidu, contando con que l’intérprete sepa qué quier facer y cómo desea tresmitir el so discursu musical. Dialogar alredor a eso. Sobre la práctica histórica y la gaita queda muncho por investigar, probar y impulsar.
«Tou camín d’esploración al rodiu la gaita paezme válidu, contando con que l’intérprete sepa qué quier facer y cómo tresmitir el so discursu. Sobre la práctica histórica y la gaita queda muncho por investigar»
La presentación del Conceyu de la Gaita foi en xunu de 2023, ¿por qué foi importante que’l gremiu volviera a xuntase dempués de los intentos en décades anteriores? ¿Qué retos crees que tien l’asociación per delantre?
Trátase xustamente d’eso, dinamizar el mundu de la gaita, la cultura asturiana de la gaita dende una perspectiva tresversal onde participen mesmo intérpretes del instrumentu que músicos d’otres corrientes. Por exemplu, ¿podríes pasa-yos a Forma Antiqva’l formulariu d’inscripción? Cualesquier persona en cualesquier parte del mundu que toque, baille, fabrique, sienta, empatice, espiche, que-y preste participar del patrimoniu cultural asturianu asociáu a la gaita pue vinculase a esta asociación. El Conceyu de la Gaita va encargase d’ufrir talleres, charres, publicaciones, eventos, festivales, espacios de collaboración al traviés d’estayes de trabayu, y tolo que los socios puedan proponer.
«El Conceyu de la Gaita vien a dinamizar el mundu del instrumentu dende una perspectiva tresversal onde participe cualesquier persona dende cualesquier parte del mundu que toque, baille, sienta, empatice o que-y preste participar del patrimoniu cultural asturianu»
Pa finar, anque yá conocemos nomes de gaiteres dende va munches décades y munches llegastis al ámbitu académicu y al escenariu públicu, paez que’l techu de cristal pa les muyeres nel mundu de la gaita ye difícil de valtiar, ¿cómo lo ves tu? ¿Qué crees que pue facese dende asociaciones y instituciones pa intentar cambiar la situación?
Nel mundu de la gaita asturiana escasea la presencia femenina, sobre too, dientro del espaciu profesional del instrumentu. Nel casu de Cuba, hasta la década de los 90 nun topamos muyeres tocando la gaita -que sepamos-. Sicasí, al averanos a la presencia de les muyeres nel ámbitu musical en xeneral, la so participación foi silenciada, non reconocida y relegada al acompañamientu, dexando los roles protagónicos siempre a la figura masculina, como amuesen los estudios de xéneru de la música.
Nel espaciu de la gaita esto vese entá más porque foi un instrumentu musical fuertemente caracterizáu nel entornu de la masculinidá: la gaita como «instrumento de arraigada tradición española, fuerte y varonil como la raza, y que debe mantenerse altiva y arrogante como lo son la gaita y el gaitero». Esto ye una cita del Progreso de Asturias de La Habana de 1958, pero ye una idea recurrente no tocante a la gaita nes fuentes periódiques. Esto ye, el tipu de «debilidá» asociada a la «delicadeza femenina» nun encaxaba dientro de los símbolos culturales asociaos al instrumentu que debíen tresmitise. En cuasi poco más de mediu sieglu d’esta visión demoledora, esti ideal caló en más d’un colectivu.
Pueo dicite qu’en dalguna ocasión tuvimos tocando énte’l propiu presidente de la Sociedá Asturiana de Beneficiencia -un señor mayor que yá morrió- y dirixóse a min tres finar de tocar y, no que se supón que debía corresponder una felicitación, foi namás la frase «una muyer tocando la gaita», con un xestu confusu na so cara; averóse al gaiteru que tenía al mio llau y dexó-y una propina. N’otres ocasiones toqué como gaitera, de pareya de gaita y tambor, siendo’l mio acompañante masculín, y dirixíense constantemente a él y non a min, pactando’l repertoriu, los momentos de tocar y hasta ofreciendo dalgún pagu material, como nel casu anterior.
Dende la investigación puedo comentate que vi comprometíu’l mio accesu a determinaes fontes o a ciertos especialistes, cuando los mesmos espacios s’ufrieron a otros compañeros asturianos. Esto déxame entrever que quiciás esta investigación y esta temática en particular nun se considera per parte de ciertos folkloristes como espaciu d’investigación d’una gaitera cubana. Quiciabes la cultura asturiana y la venceyada a Cuba pueda paecer esclusiva de ciertes masculinidaes y territorios. Tenemos cuestiones d’esti tipu anguaño y a esto tenemos qu’enfrentanos.
Más que nunca, el Conceyu de la Gaita y otres asociaciones y agrupaciones puen ofrecer visibilidá a la gaitera, desmitificar los símbolos arcaicos que determinaos grupos dominantes asociaron a la cultura de la gaita asturiana en función de los sos intereses particulares, y qu’anguaño nun representen a la colectividá -echando fuera determinaes variantes de falsos «nacionalismos» y «patriotismos», cargaos de racismos y discriminaciones de xéneru, o de cualesquier tipu. El Conceyu de la Gaita, desde la conformación de la Xunta Directiva, fáese voceru de la inclusión y la diversidá.
«La gaita foi un instrumentu musical fuertemente caracterizáu nel entornu de la masculinidá. La «debilidá» asociada a la «delicadeza femenina» nun encaxaba dientro de los símbolos culturales asociaos al instrumentu. Esi ideal caló en más d’un colectivu»
Suscríbite a les nuestres novedaes
