«Como bien d’otros asturianos, Michael Lee Wolfe ñació ensin saber que lo yera, en Pittsburgh (Pennsylvania, US). Llegáu a Uviéu pa ver un conciertu d’arpa celta na ilesia de San Xuan Real d’Uviéu nel añu 1984, queda y empieza d’ellí p’acá a trabayar con músicos d’esta tierra». Asina introduz Ismael Arias la figura del guitarrista Lee Wolfe nel llibretu de Xotes Asturianes 1984-2009, un compilatoriu que percuerre la trayectoria del músicu a traviés de proyectos como Ubiña, Xaréu, Ástura, Asturiana Mining Company o Anabel Santiago y qu’agora yá pue sentise en toles plataformes dixitales.
L’álbum inclúi 18 pieces que’l músicu estaunidense afincáu n’Asturies grabó a lo llargo de 25 años. El puntu d’alcuentru d’estos temes, amás de la participación de Lee Wolfe nes grabaciones, ye la xota: «un ritmu ternariu que xune les dos ribes: la que baña ‘Dust Storm Disaster’ y a la que se canta ‘Marcho pa Cuba’; y la que bailla’l ‘Fandangu d’Uviéu’ o la ‘Xota Punteada'», como sorraya Arias.
El trabayu yá podía mercase en formatu físicu dende va tiempu na tienda online de Musicasturiana.com, pero agora yá ta disponible tamién pa que puea sentise en cualesquier país del mundu.
Suscríbite a les nuestres novedaes
