Esti xueves 13 en La Pola Siero y el sábadu 15 n’Amandi (Villaviciosa) van celebrase el nacimientu de dos proyectos nuevos y, nos actos de presentación, la música va tar presente. Los eventos son el I Campeonatu Nacional de Guinda Casero y la presentación del colectivu Magaya Maliaya y el son van ponelu Chino «El Indio», Carlos Velasco y les sesiones de DJs que tamién trabayen colos sones del país Avante’l Pueblu y Ximiélgalo.
La primera de les cites ye la d’esti xueves 13 de payares, dende les 16h, nel restaurante Abrelatas de La Pola (Siero). Trátase del I Campeonatu Nacional de Guinda Casero y, ente la bayura d’actividaes, va haber a les 18h y con entrada llibre un conciertu de Carlos Velasco y Chino «El Indio», proyectu nel que’l cantador -ganador el pasáu añu del Premiu Obdulia Álvarez «La Busdonga» d’Asturianada na estaya masculina- fai un viaxe pela música tradicional del país acompañada del guitarrista de Mota Blues, ufriendo asina un enfoque nuevo sobre los clásicos de la canción asturiana.
Per otru llau, el sábadu 15 de payares Chino «El Indio» repite enriba l’escenariu, anque esta vegada en solitario y con otru formatu. Va ufrir un conciertu dientro del actu de presentación Magaya Malaya, «colectivu que pretende dinamizar el conceyu y xenerar un ociu y cultura alternativos en La Villa» amás de «llegar a tener un centru social autoxestionáu que pueda ser l’exe de l’actividá social nel conceyu», como presenta’l propiu ensame. Dende les 17h una nave allugada frente al llagar de Cortina va acoyer delles actividaes ente les que tamién hai una pinchada de los DJs comprometíos cola música n’asturianu Avante’l Pueblu y Ximiélgalo
Suscríbite a les nuestres novedaes
