En trés selmanes arranca la XIX edición del Festival Internacional de la Gaita (FIG) de Villaviciosa, ún de los eventos más destacaos de la música’l país qu’axunta conciertos, pasucáis, concursos, esposiciones, charres, talleres y otres actividaes qu’enllenen la capital maliaya de cultura alredor de la gaita. Como yá fixera’l pasáu añu, la organización del festival entama estos díes una campaña de micromecenalgu en Verkami cola que ye posble facese col merchandising oficial, diseñáu pola artista porruana Nieves Gonzalez «Nievesita«.
«Esti 2026 queremos que’l festival siga medrando, y se sienta más vivu que nunca, y que, un añu más, toque’l corazón de tola xente que cree na cultura como forma d’aconceyar. Pero, tamién sabemos que los tiempos nun son fáciles. Los costes de producción siguieron medrando, y queremos siguir apostando por un modelu de festival de baldre, participativu y con programación de calidá, ensín renunciar a lo que lu fai únicu», despliquen dende la Banda Gaites Villaviciosa – El Gaitero, organizadora del eventu.
Asina ye como llancen esta campaña de micromecenalgu cola que nagüen por atropar un mínimu de 1.500 euros. La xente pue facer aportaciones dende los 5 hasta los 30 euros y llevar a cambiu productos como camisetes, pañuelos, chapes, vasos, fardelas o pegadielles. «Creyemos que la cultura ye cosa de toos, y que con un pequeñu emburrionín per parte de quien cree nel festival, podemos tornar a dar vida a les cais de La Villa como se merecen. Participando nesta campaña, nun solo ayudes al festival: formes parte d’él», añaden dende’l FIG, que yá tien tola maquinaria encesa pa facer de Villaviciosa la capital de la música asturiana del xueves 3 al domingu 6 de setiembre.
Suscríbite a les nuestres novedaes
