Voblanaes surde como un nuevu espaciu pa les voces más veteranes del proyectu Voces Blancas del Nalón, en formatu de coru xuvenil mistu. Nel procesu, atoparon el camín pa garrar más cercanía cola tradición asturiana. Y nun queríen facelo de cualquier manera, queríen convertilo nel nuestru, adaptalo a la nuestra forma de trabayar y consiguir con ello desenvolver comunidá y sinerxes con otros artistes.
Nél, atopamos l’asturianu, xunto al castellán, como idioma principal de desenvolvimientu d’esti proyectu musical que tien abiertu nestos momentos un crowdfunding. Díes enantes de rematar la campaña, falamos con ellos y elles pa conocer con mayor fondura esta propuesta.
Vamos entamar contestualizando’l vuestru llabor. ¿Qué ye Voces Blancas del Nalón?
Voces Blancas del Nalón ye un proyectu coral que lleva en marcha dende l’añu 2009 nel Valle del Nalón. Pasando per distintes agrupaciones, en Voblana (acrónimu de Voces Blancas del Nalón) trabayamos por curiar y tresmitir los valores del cantar coral, dende lo educativo y dende lo social.
A lo llargo d’estes casi dos décades de percorríu, viaxemos pel territoriu asturianu, nacional y internacional representando Asturies y la nuestra cuenca minera allá onde vamos. Anguaño, Voblana compónse d’un coru infantil/xuvenil, que ye l’agrupación central; Voblacorinos, formada por neños y neñes n’edá escolar; Voblanadultos, con persones de más de 18 años y la sección xuvenil, que ye la impulsora de Voblanaes.
¿Cuándo, cómo, por qué y pa qué surde’l proyectu de Voblanaes?
Voblanaes surde a finales del 2024 col fin de ser un nuevu proyectu pa l’actual sección xuvenil del coru. Interpretando melodíes de munches partes del mundu y entendiendo’l papel fundamental de la música como conexón ente cultures, pensamos que yá yera un bon momentu pa cantar tamién dende lo que tenemos más cerca, dende “la nuestra música”. Esploramos esti conceptu de lo que ye “nuestro”, de lo que nos arrodia, tanto n’espaciu y en tiempu; descubrimos nuevos cantares, ritmos, bailles y instrumentos que non a toos nos resultaben del toos familiares, y fuimos faciéndolos tamién un poco nuestros. Teximos un repertoriu asturianu dende lo que nos resultaba cercano y tamién dende lo que nos apurría daqué nuevo. Asina, foi surdendo Voblanaes, como nuevu espaciu d’esploración pa la sección xuvenil de Voblana y como nuevu proyectu de participación y collaboración con otros y otres músicos y artistes asturianos.
«Esti proyectu de música asturiana naz amestáu a l’actual sección xuvenil del coru pola calidá musical y humana que’l grupu tien agora mesmo, llenu de sensibilidá y ciñu por tolo qu’implica cantar en grupu»
Desendolcáislo la estaya xuvenil del coru, formada pola xente más veterano. ¿Qué edaes tenéis y cuánto lleváis na agrupación?
Les edaes del grupu tán ente los 15 y los 34 años. Dalgunes de nós formamos parte de Voblana dende los sos entamos, otres persones empezaron como coristes nos coros escolares y fueron creciendo col proyectu hasta ser “de los mayores” y tamién hai dellos miembros que se xunieron nesta última etapa de Voblana, dempués del andanciu del 2020. Creyemos qu’una de les característiques del coru ye la capacidá de ser un espaciu abiertu pa los que quieren pertenecer a él mientres un periodu más o menos ampliu de la so vida. Y tamién tratamos de ser un llugar al que volver pa los que formaron en dalgún momentu parte de l’agrupación, sobre manera en delles feches marcaes como la nuestra navidá particular, la “Voblanavidad” que celebramos a finales de cada añu.
Esti proyectu de música asturiana naz amestáu a l’actual sección xuvenil del coru pola calidá musical y humana que’l grupu tien agora mesmo, llenu de sensibilidá y ciñu por tolo qu’implica cantar en grupu. Decidimos dar un pasu más allá plantegando una idea más complexa y abierta al ver que’l grupu, pola so trayectoria, podía face-y frente y tamién esfrutar del procesu.
Una de les coses más llamatives de Voblanaes ye l’adaptación coral de temes d’artistes contemporáneos de la música n’asturianu. ¿Qué criteriu siguistis pa escoyer a los artistes? ¿Pue sabese yá los cantares que vais adaptar?
La verdá que la selección surdió de manera mui espontánea y natural. Según díbemos teniendo idees, fuimos escribiendo o llamando a los artistes que nos paecía que pudieren apurrir dalguna melodía especial qu’encaxara no que tábamos creando. Estes conversaciones diéronse tanto porque yá conocíemos primeramente como porque compartiéramos proyectos de mancomún. Les respuestes fueron mui positives y abiertes a la collaboración. Non en tolos casos foi cenciello escoyer el cantar que díbemos adaptar, pero sí tratamos, en toos ellos, de dialogar como grupu pa llegar a una decisión.
El repertoriu al completu nun lu vamos compartir hasta l’estrenu del espectáculu’l 19 de setiembre. Mentanto, vais tener que siguir les pistes que vamos dexando nes nuestres redes sociales y los videos que tamos publicando estes selmanes, amás de lleer un pocu ente llinies nesta entrevista…
«Delles pieces tradicionales escoyímosles de l’Antoloxía Coral Asturiana y del Cancioneru Popular de la Llírica Asturiana de Torner. Otres van sirvir d’enllaz ente cantar y cantar, y les postreres, que van ser el zarru del espectáculu, iguámosles con muncho ciñu y curiáu pa caltener la so esencia»
¿Cómo foi’l procesu d’adaptación d’estos temes?
El procesu de crear les versiones foi (y sigue siendo) una de les partes más divertíes y tamién novedoses del nuestru trabayu. Solemos interpretar pieces a partir de partitures yá preparaes p’agrupaciones corales, pero nesti casu delles de les versiones nacieron de les idees del grupu y de les característiques del mesmu (númberu de componentes, tipos y timbres de les voces…)
Fuimos xestando les adaptaciones nos ensayos d’estos últimos meses, probando idees, refugando delles otres y proponiendo delles más, hasta llegar a una propuesta propia y orixinal que tamos naguando por amosar en directo.
Per otru llau, tamién vais interpretar pieces tradicionales bien conocíes. ¿Cuáles y por qué estes? ¿Incluyís arreglos nuevos nelles tamién?
Delles pieces tradicionales escoyímosles de l’Antología Coral Asturiana y del Cancionero Popular de la Lírica Asturiana de Torner. Otres van sirvir d’enllaz ente cantar y cantar, y les postreres, que van ser el zarru del espectáculu, iguámosles con muncho ciñu y curiáu pa caltener la so esencia apurriendo, al empar, nuevos elementos propios.
Como vos dicíemos, agora nun vos vamos compartir la llista de cantares pa caltener un pocu de misteriu y convidavos a qu’esfrutéis con nós en directo del espectáculu, qu’esperamos poder amosar en más d’una ocasión.
«Cuando pensamos en formes de texer venceyos con Asturies y colo que se ta creando en y sobre’l territoriu asturianu, vimos que podía tener muncha fuerza (y munchu sentíu) conectar tamién coles artes plástiques y col diseñu d’indumentaria»
Na descripción de la campaña de crowdfunding mentáis dos obres: l’Antología Coral Asturiana y el Cancionero Popular de la Lírica Asturiana. ¿Qué papel xueguen en Voblanaes?
La publicación de l’Antología Coral Asturiana sirviónos d’inspiración pa embarcanos nesta aventura cola música asturiana como ponte. Cuando supimos de la so esistencia y de los valores que trata de tresmitir, sentimos que como agrupación coral teníemos una posición dende la que falar de música asturiana, dende la qu’esfrutala y dende la que plantegar daqué nuevo pa formar tamién parte del panorama musical asturianu actual.
En cuanto al Cancionero de Torner, pa nós ye una referencia clave de la música asturiana, n’especial de la música coral. Les melodíes que van abrir el conciertu son dalgunes de les más interpretaes por coros asturianos nes últimes décades, que recoyó Torner nel so momentu y que siguen cantándose anguaño, yá seya nos escenarios o en cualquier ocasión festiva na que la xente s’anima a cantales.
Amás de la música, nel proyectu xuega un papel destacáu otres manifestaciones como les artes plástiques y tamién collaboráis con diseñadores de ropa como Ringo Rango. Ye un apueste claro por interrellacionar asina a creadores culturales y crear comunidá.
Eso ye. Cuando pensamos en formes de texer venceyos con Asturies y colo que se ta creando en y sobre’l territoriu asturianu, vimos que podía tener muncha fuerza (y munchu sentíu) conectar tamién coles artes plástiques y col diseñu d’indumentaria. Col desenvolvimientu de lo que ye agora’l crowdfunding, incorporar ilustraciones d’artistes asturianos paeciónos una idea mui potente p’amosar lo que tamos proponiendo. Dende la vinculación de territoriu, música y el nuestru identificativu color azul, diez ilustradores fixéronnos les sos propuestes. Toes elles, dende’l so estilu, amuesen una mirada de lo que ye Voblanaes, de lo que ye cantar música asturiana y compartila con otros. Podéis veles toes nes nuestres redes sociales y, pa facevos con una copia, podéis participar nel crowdfunding, yá que, de momentu, ye la forma inédita de consiguiles.
Tocantes a la collaboración con Lluci, de Ringo Rango, teníemos claro que queríamos un vestuariu nuevu, que nos agrupara y qu’al empar nos identificara. Ensin davos munches pistes, cuntámosvos que Lluci consiguió dar con una pieza única y orixinal que lo consigue y que vamos amosar bien llueu.
«Decidimos que les pieces fueren toes asturianes pero non necesariamente n’asturianu. Valoramos cada casu y intentamos diseñar un repertoriu qu’amosara tanto lletres n’asturianu como en castellán»
Voblanaes ye la primer vegada qu’apostáis dafechu pola música asturiana y n’asturianu tres 20 años de trayectoria. ¿Por qué decidistis dar esti pasu en defensa de la cultura, identidá y llingua asturiana?
Esta nun va ser la primer vegada que cantemos pieces asturianes nin cantares n’asturianu, pero sí va ser la primer vegada na que’l focu tea puestu nelles. Como vos comentábemos, sentimos que yera un bon momentu pa dar esti pasu, tanto pol contestu cultural d’Asturies como pol procesu personal del grupu. Tamién decidimos que les pieces fueren toes asturianes pero non necesariamente n’asturianu. Valoramos cada casu y intentamos diseñar un repertoriu qu’amosara tanto lletres n’asturianu como en castellán, y lo mesmo tamos tratando de facer nes nuestres intervenciones, defendiendo la cultura asturiana y el so valor ensin dexar fuera nenguna posibilidá que pueda arriquecer y apurrir al proyectu.
Esperamos tamién qu’esti repertoriu quede más años col grupu, pa poder compartilo en más ocasiones y en más llugares del mundu, sirviendo d’amuesa de lo que somos, de la nuestra cultura, del nuestru presente y de la nuestra historia.
Ún de los oxetivos de la campaña de crowdfunding ye poder representar l’espectáculu nel Wien Music Festival 2026 12th International festival of choirs and orchestras in Vienna. ¿Qué podéis cuntar d’esti eventu pa quien nun lo conoza?
Ye un festival qu’agrupa cada añu tanto a coros como a orquestes de distintes partes del mundu. Nél, como coru participante tenemos la oportunidá d’interpretar ente 30 y 45 minutos de repertoriu llibre. Esti planteamientu déxanos facer de la nuestra participación nel festival una mui bona oportunidá de llevar a la que se considera la capital europea de la música melodíes nuestres, dende la tradición hasta’l contestu más contemporaneu.
Amás de coles nuestres voces, vamos viaxar con dellos instrumentos tradicionales que nos acompañarán na actuación, fabricaos por artesanos asturianos que tamién formen parte de Voblanaes y de lo que tamos construyendo mientres el procesu.
Aparte, vamos poder velu enantes La Benéfica. Si podéis avanzar daqué de la puesta n’escena.
Ensin entrar muncho en detalle, va ser un espectáculu nel que la música y los cantares seyan les protagonistes. Nun va haber muncha esplicación nin presentación de los cantares, sinón que pretendemos que toles melodíes sigan un filu qu’amuese’l mensaxe xeneral que buscamos llanzar: cantar xuntos ayúdanos a entendenos, a entender a otros, a dialogar colos que nos arrodien y colos que nos precedieron. Cantando xuntos y xuntes conectamos cola tradición, col presente y col futuru dende un llugar amable y sollerte dende’l que mirar.
Amás, como d’esta vuelta nun tenemos llende de tiempu, vamos interpretar dalgún tema más que nel conciertu de Viena, presentando un espectáculu completu qu’esperamos que pueda tresmitir tolo que queremos compartir con vós .
Tamién tais asoleyando dellos videos d’adelantu en redes sociales. ¿Hai intención de grabar profesionalmente los temes o l’espectáculu pa llueu editalos?
Encantaríanos poder grabar de forma profesional más cantares del espectáculu, y tamién poder facelo en directo nel conciertu de la Benéfica del 19 de setiembre. Too ello va depender del resultáu del crowdfunding y de les posibilidaes económiques que puedan surdinos. Pensamos que tener la oportunidá de grabalo pue facer que perdure y tamién pue sirvir d’inspiración pa otros proyectos similares que vean na música asturiana un sitiu qu’habitar y curiar.
«La música coral ye la base del trabayu, pero non lo único que tenemos en cuenta a la de proponer o aceptar proyectos»
Davezu asóciase la música coral a propuestes pa xente más mayor. Sicasí, iniciatives como la vuestra o la del Coro Joven de Gijón amuesa qu’hai daqué relevu na escena. ¿Cómo veis la situación actual de la música coral, la implicación de la mocedá y estos proyectos novedosos dientro d’ella?
Al nuestru alredor vemos qu’esisten más agrupaciones xuveniles y que, en concretu, dende la musica coral tán plantegándose munches oportunidaes pa que la xente mozo tenga espacios pa cantar y participar cantando. Nel nuestru casu, dende los últimos años, la música coral ye la base del trabayu, pero non lo único que tenemos en cuenta a la de proponer o aceptar proyectos. Va unos meses zarramos ún de los más especiales nos que participemos: Ensemble, Voices in harmony for minds in balance, qu’axuntaba música coral, trabayu colectivu y comunitariu y la temática de la salú mental. Esfrutamos enforma del procesu y tamién reflexonamos con él sobre la nuestra forma d’entender lo que facíemos dende Voblana y lo que podemos facer y plantegar nel nuestru alredor.
Agora mesmo, somos cerca de 45 coristes nes agrupaciones infantiles y xuveniles de Voces Blancas del Nalón, con una ilusión xeneralizao por tolo que facemos. Cuando nos falen sobre la desafección de los y les moces, pensamos nel regalu que ye poder tener esti espaciu onde los mozos y moces quieren tar, participar y del que quieren siguir formando parte. Esperemos que pueda siguir siendo asina munchos años más.
Sois un proyectu venceyáu a la Cuenca’l Nalón. En 1961 la UNESCO definió a La Felguera como’l “Kilómetro más cultu d’Europa”. ¿Qué queda d’aquello en 2026?
Quiciabes agora mesmo la UNESCO nun considere que merezamos el mesmu títulu, pero sí creyemos que la potencia creativa y cultural del valle qu’habitamos sigue siendo notable. Hai agrupaciones musicales,teatrales y culturales de tou tipu que lleven décades funcionando na zona, calteniendo vives les chispes que nacieron va años. Como rescampla, col amenorgamientu de población, los proyectos tamién baxaron, pero los que se caltienen siguen faciéndolo con fuerza. Polo menos eso creyemos que tenemos que pensar pa caltenenos presentes, anque non siempre seya fácil.
A lo último, nun creyemos que la cultura tea “morriendo”, nin nos gusta falar d’arte nesos términos. Si daqué tienen d’especial les espresiones artístiques y, nesti casu, los cantares, ye que consiguen perdurar nel tiempu, siempre y cuando heba daquién que les interprete y daquién que les escuche. Nel Valle del Nalón, creemos qu’hai entá muncha esperanza y munches ganes de siguir faciendo música y arte dende’l territoriu qu’habitamos, dende la nuestra cuenca minera. Quiciabes nun seyamos el kilómetru más cultu d’Europa, pero quédanos muncha tira por dar y, por supuestu, munchos cantares por cantar.
Y yá pa rematar, ¿qué diríeis a la xente pa que s’anime a collaborar con vos na campaña de crowdfunding?
Como proyectu autoxestionáu, non siempre tenemos la oportunidá de llevar a cabu tolo que queremos, nin de la manera que nos gustaría. Dar sofitu a esti tipu d’iniciatives nun ye namás una donación económica, ye tamién un emburrión a la cultura, a la collaboración, al asociacionismu… Dende la nuestra propuesta, buscamos xenerar sinerxes con otres y da-yos valor. Entendemos que trabayar en solitariu ye muncho menos interesante y sensatu que facelo en compañía, porque facer les coses xuntos ye más cenciello, más guapo y tamién tien muncho más sentíu.
Collaborando col crowdfunding vais tar faciendo posible una propuesta propia que tamos intentando que pueda ser tamién la vuestra: que seya collaborativa, participativa y qu’inclusive pueda sirvir d’exemplu a otros proyectos similares que tamién busquen fines asemeyaos.
Esperámosvos el 19 de setiembre na Benéfica pa celebrar xuntos y xuntes la nuestra música, les nuestres raíces y la nuestra ilusión por siguir atopando razones pa xuntanos, sobre manera cuando lo facemos pa cantar.
Suscríbite a les nuestres novedaes
