Naz una nueva iniciativa pa puxar polos videoclips asturianos. El Mediu Güeyu Festival de Villaviciosa convoca na so decimotercer edición el I Concursu de Videoclips grabaos nel mediu rural asturianu que cunta con un premiu principal de 500 € en metálicu, amás d’una calabaza grande. El plazu pa presentar les propuestes -a traviés del corréu [email protected]– remata’l 1 de setiembre y dalgunos de los requisitos son que tienen que tar feches n’Asturies, han ser de calter independiente -non venceyaes a grandes productores nin distribuidores-, deben xirar alrodiu’l mediu rural y tienen que tar feches a partir de 2023.
Les bases del concursu tamién recueyen que los videoclips pueden tar grabaos con cualquier dispositivu (teléfonos móviles, cámares de cualquier tipu dixitales o analóxiques…), non afectando a la puntuación los medios técnicos usaos. Al empar, pue usase cualquier técnica: imáxenes de vídeu, fotografía, animación d’ilustración o collage, xeneración d’imágenes con medios dixitales. El xuráu va dar a conocer el 15 d’ochobre los videos escoyíos pa la final, de los que va valorar la «orixinalidá de la propuesta, la execución técnica, l’averamientu a la cultura rural y la inclusión de berces y/o calabaces nel videoclip».
Cada realizador pue presentar un máximu de dos videoclips y los premios van entregase na Gran Gala Mediu Güeyu 2024, que se va facer en payares en Villaviciosa. El premiu al meyor videoclip ye de 500 €, proyección del videoclip nel festival y una calabaza grande; mentes que les demás estayes –Meyor Cantar, Meyor Montaxe, Meyor Vestuariu y Maquillaxe y Meyor Fotografía-, van llevar una calabaza y una riestra berces. Con esta iniciativa Mediu Güeyu trabaya por «promover la realización de videoclips nel mediu rural asturianu y ayudar a dar a conocer proyectos audiovisuales nuevos».
Suscríbite a les nuestres novedaes
