La Fundación Municipal d’Educación, Cultura y Universidá Popular del Ayuntamientu de Xixón ta acabante d’anunciar delles actividaes musicales pa xunu y xunetu: los XII Alcuentros de Músiques Asturianes, los I Encuentros Corales de Fátima, los XXIX Talleres de Improvisación Musical y un conciertu de Ferla Megía nel espaciu El Palacio. Residencias Artísticas y Acción Cultural formen la programación. Amás, dende’l Conceyu tamién anunciaron la vuelta del Festival Arcu Atlánticu, que se va celebrar ente’l 30 de xunetu y el 4 d’agostu.
Dende güei martes 4 y hasta’l 21 de xunu dellos espacios de la ciudá acueyen los XII Alcuentros de Músiques Asturianes. Amás de les actuaciones musicales de La Maramoniz, Draque y Alienda, va haber una tarde en danza con Pandereteros d’Anguaño y 6 Riales, la presentación del llibru La Xorda de Rodrigo Cuevas -que yá tien les places escosaes- y un alderique alredor del relevu xeneracional na música tradicional asturiana nel que participen Celia Corrales, Rodrigo Joglar, Santi Galguera y Xicu Ariza,
Güei tamién entamen los I Encuentros Corales de Fátima. Hasta’l 14 de xunu la Ilesia de Fátima va acoyer tolos díes a les 20h les actuaciones d’un total de 15 corales xixoneses: Coral Amanecer, Ensemble Vocal Gijón, Coro Asturiano de Gijón, Coral de Porceyo, Coro de la Escuela de Música Enrique Truán, Coral Costa Verde, Coral Asturiana de Gijón, Orfeón San Lorenzo, Coro Más Que Jazz, Coro de La Camocha, Orfeón del Real Grupo de Cultura Covadonga, Coro Infantil de Gijón, Coro Rosario Acuña, Coral Polifónica Gijonesa Anselmo Solar y Coro Joven de Gijón. Nesti documentu ta tola programación d’esta cites cites promovíes pola Ilesia de Fátima cola collaboración de la Federación Coral Asturiana, y el sofitu de la Fundación de Caja Rural de Gijón y la Fundación Municipal de Cultura.
A la programación recién de la FMECyUP súmense colos XXIX Talleres de Improvisación Musical pa los que s’abrió ayeri’l plazu d’inscripción. Estes clases promovíes pol Taller de Músicos de Xixón ufre un itinerariu alternativu y complementariu al de la formación musical reglada nos conservatorios, trabayando más directamente con músiques populares urbanes, sobre manera’l jazz. D’esta manera, entemecen la interpretación instrumental cola práctica de tocar en grupu, perfeccionase nel arte de la improvisación y finalmente tener la esperiencia de poder participar nun conciertu. Los talleres tienen dos modalidaes: junior (ente los 11 y 15 años) y senior y los dos conciertos venceyaos al programa -ún de profesoráu y otru d’alumnáu- van ser el miércoles 10 y el vienres 12 de xunetu nel Centru de Cultura Antiguu Institutu.
Ferla Megía y Arcu Atlánticu
La estaya de Cultura del Ayuntamientu tamién creó apocayá’l proyectu El Palacio Residencias Artísticas y Acción Cultural, allugáu en Contrueces, nel Palaciu San Andrés de Cornellana, que data del sieglu XVIII, A lo llargo d’esta selmana va haber delles actividaes nesti espaciu ente les que ta presente la música asturiana con un conciertu del artista de música urbana, folk y pop Ferla Megía esti sábadu 8 a les 13h.
Pa rematar esta axenda musical, ta la recuperación del Arcu Atlánticu dempués de la que l’anterior corporación lu cancelara de la so programación festival. Pel momentu yá adelantaron que Nuberu va actuar el 31 de xunetu a les 20.30h nel Muséu del Pueblu d’Asturies, amás d’otres propuestes foriates como Tanxugueiras. Los escenarios nos que va haber actividaes van ser la Plaza Xovellanos, Plaza Mayor, Plaza La Corrada, laPlaza del Periodista Arturo Arias (Llavaderu), laPlaza d’El Campu Valdés, los Xardinos de la Reina, L’Atalaya, el Centru de Cultura Antiguu Institutu, Antigua Escuela de Comerciu, el Muséu del Pueblu d’Asturies y Colexata de San Juan Bautista
Suscríbite a les nuestres novedaes
