El II Semando Fest va ser el 9 de febreru n’Uviéu

Vuelve’l Semando Fest. Tres la exitosa edición del añu pasáu -qu’escosó entraes díes enantes de la so celebración-, el festival de música moza n’asturianu qu’entama Musicasturiana.com y Ixuxú Cultura va volver a facese en 2024. La cita ye’l vienres 9 de febreru na sala Lata de Zinc d’Uviéu y nella van volver a participar cuatro proyectos d’estremaos estilos musicales cola característica en común de que la mayoría de los sos componentes son menores de 34 años. A partir de la selmana que vien van dir anunciándose los nomes, amás de poner les entraes a la venta. Mentanto, preséntase’l logu d’esta edición fechu pola diseñadora carbayona Beatriz Menéndez col so proyectu Made in Chigre.

Anque la fecha anunciada na presentación del discu Semando Son foi la del 10 de febreru, el Semando Fest tuvo que camudar de día pa nun coincidir con otru eventu mui destacáu pa la música d’equí, la presentación del tercer álbum de L-R, V.O.S., na sala Acapulco de Xixón. Superáu esti pilancu, la organización marca yá nel calendariu la segunda edición d’esta iniciativa que nagua por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.

Precisamente, una d’eses creadores moces ye Beatriz Menéndez (Uviéu, 1992), ye la ilustradora detrás del proyectu Made In Chigre, una propuesta d’ilustración “con denominación d’orixe” que busca retratar y da-y valir la riqueza etnográfica d’Asturies, celebrando les sos tradiciones y idiosincrasies dende una perspectiva contemporánea con muncha ironía. Ella ye la encargada de da-y identidá visual y de desendolcar tolos diseños d’esti II Semando Fest.