Xaime Arias presenta en concierto ’10 canciones asturianes pa gaita y pianu’
Esti vienres 17 de payares el salón d’actos de la Escuela de Música y Baille Tradicional Villa de Xixón acueye la presentación de 10 canciones asturianes pa gaita y pianu. A les 20.30h y con entrada llibre, l’autor, el mierense Xaime Arias, va tar acompañáu del gaiteru uvieín Carlos Casado pa presentar esta obra. L’actividá va emitise tamién per streaming a traviés del instagram de Villa de Xixón. L’eventu ta enmarcáu dientro de les II Xornaes Musicales qu’entama esta banda de gaites y escuela xixonesa.
10 canciones asturianes pa gaita y pianu enllaza cola llamada Edá d’Oru de la música asturiana, aquella que se dio ente finales del sieglu XIX y les primeres tres décades del XX, periodu nel que surdieron los grandes clásicos de la tonada, tanto en cantadores como en compositores. Nesti volume editáu por Trabe, l’autor sigue’l camín abiertu por grandes compositores -mayormente pianistes- como Baldomero Fernández, Manuel del Fresno, Rufino González-Nuevo o Eduardo Martínez Torner. Toos ellos arreglaron pieces de la tradición vocal asturiana pa pianu o compunxeron otres orixinales dafechu; agora Arias retoma esta xera presentando una decena de temes musicales nos que los protagonistes son el pianu y la gaita.
El llibru surde de la collaboración de va tiempu ente Xaime Arias y intérpretes como Liliana Castañón, Anabel Santiago, Rosario González, Sandra Álvarez o los hermanos Valle Roso, amás del grupu de trabayu Axuntábense, entamáu nel Conservatoriu Profesional de Música «Anselmo González del Valle» (Uviéu). Nesti volume recuéyense les partitures de siete cantares de los adscritos al estilu de lo que se conoz como tonada y d’otros tres del repertoriu tradicional, por exemplu los afamaos «A la mar vanse los ríos», «Baxaron cuatro ayeranos», «La mina y el mar» o «Si quieres que te cortexe».
Nel prólogu, l’estudiosu de l’asturianada y hermanu del autor, Ismael Arias, comenta: «Los gaiteros siempre fueron los acompañantes naturales de la canción asturiana y, na midida de les sos posibilidaes, esti trabayu quier valir d’averamientu de los alumnos de gaita a esti repertoriu nel qu’esti instrumentu sigue teniendo un papel protagónicu». La intención de Xaime Arias ye siguir afondando nesta xera y, nel futuru, publicar nueves entregues d’ella.
Pianistes más renomaos
Xaime Arias (Mieres del Camín, 1966) ye profesor nel Conservatoriu Superior de Música «Eduardo Martínez Torner» d’Uviéu. Tien una trayectoria perllarga como intérprete, siendo ún de los pianistes más renomaos del país, venceyáu al mundu de la canción asturiana como compositor, acompañante al pianu de bien de cantadores, pianista oficial del Concursu «Cuenca del Caudal» o xuráu en dellos certámenes; ye tamién integrante de formaciones jazzístiques como Xaime Arias Trío, Quatro Jazz Quartet o Slum Suit.
