El primer spoken word en llingua asturiana

El spoken word ye un tipu de performance poética qu’axunta elementos lliterarios, sonoros y musicales. L’orixe d’esti xéneru n’asturianu protagonizaríalu un pianista proveniente de la música clásica y el jazz, Rubén Tuero, quien publicaba nel añu 1991 la casete La Fonte les Xanes.

El spoken word, que podríemos traducir lliteralmente como como «palabra falada», ye un tipu de performance poética qu’axunta elementos lliterarios, sonoros, musicales y en dellos casos teatrales. Céntrase xeneralmente na representación de la palabra como tal, el tonu, la entonación, el ritmu, los xestos y la espresión facial, ente otros elementos. Entemez el discursu narrativu cola improvisación y recursos poéticos como la rima, los xuegos de palabres o les repeticiones. Trátase de da-y a la voz humana toles capacidaes y posibilidaes d’un instrumentu musical.

Esti tipu de tendencia poético-sonora fíxose mui popular ente la comunidá afroamericana nos años 60, yá que solía ser ún de los medios artísticos usaos pa protestar contra la discriminación racial y a favor de la igualdá de derechos civiles de la comunidá negra.

Nun primer momentu el ‘spoken word’ tuvo venceyáu fundamentalmente al jazz, pero posteriormente autores como John Cage, Patty Smith, Serge Gainsbourg, Leonard Cohen o Madonna esperimentaríen con él fusionándolu con otros xéneros como la música sinfónica, el cabaré, el rock o’l pop.

Carátula de la cinta

L’orixe del spoken word n’asturianu protagonizaríalu un pianista proveniente de la música clásica y el jazz, Rubén Tuero, quien publicaba nel añu 1991 la que puede considerase como la primer obra d’esti estilu en llingua asturiana, tratábase d’una casete titulada La Fonte les Xanes qu’incluía cuatro pieces inspiraes na mitoloxía asturiana, pero con un tratamientu adultu y amorosiegu: «Ventolín», «Xanes», «Trasgu» y «La Fonte les Xanes». Son cuatro composiciones llargues onde’l propiu Rubén Tuero recita y toca los teclaos, sacante una pequeña collaboración na voz de Lupe Díaz Bernabé. 

Foi ésti un primer averamientu ente la llingua asturiana y esti estilu de, podríemos dicir, palabra musicada, que depués diba tener cierta continuación de manera puntual. Nesti sen, el llabor d’escritores como Susana Sela (en collaboración col músicu xixonés Luis Núñez), Pablo X. Suárez (al traviés del proyectu llamáu El Velcro) o Pablo Texón (a comuña col cantautor turonés Alfredo González), son bonos exemplos d’estos testos poéticos con acompañamientu musical.

// Calca equí pa sentir La Fonte Les Xanes //

Portada de la casete

Dexa un comentariu

X