Burbús llancen el so primer EP, que presenten esti sábadu con un conciertu en Xixón

Yá ta a la venta en musicasturiana.com y en toles plataformes dixitales, el primer EP de Burbús. Cinco veteranos de la escena asturiana crearon esti grupu que presentaron asina: «Partimos de la tradición, pero rápido enfocamos l’aldu escontra un llugar alloñáu de les categoríes y estilos musicales concretos coles llendes qu’ellos suponen, faciendo un repertoriu variopintu y eclécticu que xunta tradición y creación nueva». Esti sábadu 28 de mayu, a les 19h, nel salón de conciertos de la Escuela de Música Tradicional Villa de Xixón (c/ Severo Ochoa 22), van dar la so primer actuación pa presentar esti trabayu.

Burbús garra’l so nome del verbu burbusar y ta formáu por José Luis García -director de la Banda de Gaites Villa de Xixón, Magüeta y Villa de Jovellanos- a les gaites y flautes; al violín, Juan Diego Gómez -que tien tocao en proyectos d’estilos tan estremaos como’l folk, rock, techno, gypsy jazz o heavy metal-; al curdión, Ginés Fernández -músicu de formación clásica que tocó n’agrupaciones d’esti calter y tamién bandes folk-; a la voz y a la guitarra José Martínez -más conocíu nos últimos años como Ún de Grao gracies al so proyectu en solitario, anque tien tocao nuna montonera bandes-; y al baxu, chelo y coros, Javier San Marcos -venceyáu a grupos jazz y blues-.

«Esti grupu nun tien xéneru musical, pero la nuestra música ye xenérica en sí mesma»., comenten dende esta formación que nel so repertoriu tien «una mecigaya de temes propios y revisiones de pieces tradicionales». Col so primer EP amuesen lo que lleven trabayando dende qu’entamaron el so camín en 2021.