El proyectu d’electrónica y hiphop Bimenes UnderPrau llanza ‘Fesoria y Garabatu’
Electrónica, hiphop y lletres n’asturianu de calter políticu y reivindicativu. Esa ye la base de ‘Fesoria y Garabatu’, el nuevu trabayu de llarga duración que Bimenes UnderPrau asoleya a traviés de la plataforma dixital bandcamp. Esta obra supón la sesta referencia d’esti proyectu musical tres llanzar los álbumes ‘Cosadiella’ (2019), ‘Viaxes a nenyuri’ (2019) y los EP ‘Danka’ (2019), (E)motion (2020) y ‘Pelo Segao’ (2021).
«Bimenes UnderPrau surde nel 2018 cuando Javi Estancu -músicu güei de Los Maniseros- y yo punxímonos a esperimentar cola lletrónica y los sintes a fueu», comenta Pablo M. Testa, cabezaleru del proyectu. El músicu esclaria que «al principiu taba más orientáu a la narrativa sonora, a la electrónica y a la performance; a ser por dicilo de dalguna manera, música qu’acompañaba otres artes» y que dempués de «sesiones d’electrónica o de chill; pintura en vivo; proyecciones y curtiometraxes; poesía teatralizada…», foi garrando forma hasta ser lo qu’anguaño.
Dempués del anterior EP ‘Pelo Segao’ -«una maqueta hip-hopera con bases llibres»-, Bimenes UnderPrau entamó a xuntar electrónica, lletres y sintes pa dar forma a ‘Fesoria y Garabatu’. Testa destaca que musicalmente toles pieces tienen «un puntu frenéticu» y que les lletres polítiques acompañen per primer vez a los sones. «Nel primer grupu escribíemos una lletra y nun teníemos idea; tirábemos de los temes de los que falaben les lletres de los grupos que mos prestaben. Nun pienses muncho no que pienses tú, sinón nel discursu que crees compartir», comenta’l músicu destacando qu’estos nuevos testos traten cuestiones emocionales y polítiques dende la esperiencia propia. «Cómo enfrentamos el nuesu discursu ideolóxicu, onde imaxinamos una sociedá fantástica de la que dempués nun mos facemos cargu nos nuesos espacios cotidianos», el fracasu reforma del Estatutu o «les rellaciones sexoafectives»; son dalgunos de les temátiques sobre les que reflexona l’álbum.
El directo
Bimenes UnderPrau tien la intención de llevar ‘Fesoria y Garabatu’ a los conciertos. Sicasí, Pablo M. Testa sorraya que tien dos problemes pa ello: «les composiciones son improvisaes y grabaes en base a esa improvisación. Polo tanto, tocalo en directo ye inviable. Lo único sedría asumilo como les bases de rap que se suelten nel directu» y que «nun esiste voz principal con coros. Sinón que son tres voces principales n’armonía que les grabo yo, polo que necesitaría o bien que dos persones fixeren eses voces en directo; o bien soltales xunto a la base y facer una d’elles en directo».
El músicu tamién comenta que quier incluyir «la reproducción de vídeos y proyecciones» a los shows en vivo. D’esta manera y con trabayos como esti ‘Fesoria y Garabatu’, la escena d’electrónica asturiana va espoxigando y Bimenes UnderPrau ye ún de los nomes que xunto a otros como Fruela 757, Llevólu’l Sumiciu, A Fesoria o L.lercia esperimenten con soníos electrónicos y identidá asturiana.
