Musicasturiana.com emite en directo la rueda prensa de Dixebra
Esti vienres 29 d’abril a les doce del mediudía Dixebra van dar una rueda de prensa na sede de la SGAE d’Uviéu pa presentar el so trabayu nuevu ‘Ente la niebla’ y falar de más actividaes rellacionaes col so 35 aniversariu. Musicasturiana.com va cubrir l’eventu emitiendo en directo la rueda prensa a traviés del so Facebook.
‘Ente la niebla’ ye la obra más ambiciosa de Dixebra. El míticu grupu de rock astur regresa con venti cantares y un llibru de 112 páxines onde too ta cuidao hasta l’últimu detalle. Música, lliteratura, ilustraciones y fotografía histórica axúntense nun trabayu que tien tamién un calter colectivu. La diversidá de soníos –rock, reggae, punk ska, folk, funk, metal….- de la música tien el puntu d’alcuentru nunes lletres que tienen un mesmu conceptu: homenaxear al pasáu, presente y futuru de les clases populares asturianes.
