Novedaes na tienda online: LP de Rodrigo Cuevas, Nacho Vegas y Banda Gaites Noega
La tienda online musicasturiana.com sigue ampliando catálogu y yá son más de 380 referencies les que tán a la venta pa cualquier país del mundu a traviés d’Internet o na oficina asitiada nel barriu xixonés d’El Natahoyo -na cai La Estrella nº1 Baxu Izquierda-. Les últimes incorporaciones al catálogu son la edición en vinilu de ‘Manual de Cortejo’ de Rodrigo Cuevas, el trabayu nuevu de Nacho Vegas ‘Mundos Inmóviles Derrumbándose’ y el ‘Poema sinfónico para banda de gaitas, quinteto instrumental y recitador’ de la Banda Gaites Noega.
‘Manual de Cortejo’ (Aris Música, 2019) ye’l primer llarga duración del axitador folclóricu Rodrigo Cuevas. Producíu a cuatro manes ente l’aclamáu Raúl Refree (Rosalía, Fermin Muguruza, Silvia Pérez Cruz…) y el propiu Cuevas, esti discu entemez tradición y modernidá, vida rural y la llucha por alcontrar los valores necesarios nun mundu cada vez más ególatra y despreocupáu. ‘Manual de Cortejo’ ye música contemporánea nacida dende lo más fondero de la tierra.
‘Mundos Inmóviles Derrumbándose‘ (Oso Polita Records, 2022) ye’l discu nuevu de Nacho Vegas . El cantautor xixonés regresa col so novenu álbum de llarga duración en solitario y nél destaca qu’incorpora dos cantares n’asturianu con lletra firmada por Pablo Texón. Esta edición en formatu digibook ta editada con tapa dura, llibru de 64 páxines y el CD. Amás inclúi el cantar “Muerre’l branu”, que namás se pue sentir nel discu en formatu físicu
‘Poema sinfónico para banda de gaitas, quinteto instrumental y recitador’ (Resistencia, 2012) ye una grabación en directo fecha na Plaza Mayor de Xixón pa cellebrar el 20 aniversariu de la Banda Gaites Noega. Una composición musical d’Eduardo G. Salueña na que s’entemez la músca tradicional asturiana y una parte representativa del repertoriu de la banda, con material nuevu con aires de música sinfónica, jazz, folk, electrónica y rock progresivo. La banda gaites, lliderada por Pablo Rodríguez Alonso, actúa de cuerpu orquestal. Tamién participa un quintetu instrumental formáu por Eva Díaz Toca (Pauline en la Playa, Slum Suit), Horacio García (Buensuceso, Xan Campos Trío), Héctor Braga, Daniel Álvarez Mora (Corquiéu) y Eduardo G. Salueña (Senogul), quien lleva la dirección musical. Cunta cola collaboración especial d’Anabel Santiago y los testos n’asturianu de Lluís Xabel Álvarez y Fran Molinero. El discu ganó’l Premio AMAS 2013 a la Mejor Canción Folk por “La muyer que te lluchó”.
