El Válgame Fest celebra la so segunda edición ampliando los díes d’actividaes
Tres del éxitu de la primer edición, el Válgame Fest vuelve a facese esti añu y amplía la so programación. Del 6 al 14 de mayu la llocalidá cabraliega d’Arenas va acoyer una esposición y una charra, esperiencies gastronómiques, xuegos tradicionales, mercáu artesanu y les actuaciones musicales de Los Gascones, José Manuel Tejedor, Llan de Cubel, Skontra y les DJs Les Greques. Too ello de baldre.
Esti 6 de mayu a les 12h entama la programación cola charra El baille del Corri-Corri. La construcción d’un símbolu a cargu de Yolanda Cerra. Esta ponencia sirve tamién pa inaugurar la esposición El Corri-Corri. Tradicion y Sentimientu que va tar espuesta nel Atenéu Cabraliegu tola selmana. Ente’l 6 y el 14 tamién va haber un pinchu y un menú Válgame Fest en dellos chigres y restaurantes d’Arenas.
El sábadu 13 ye’l día gordu del festival. Dende les once la mañana va haber mercáu artesanu na Plaza del Castañéu y ésti va tar amenizáu por xuegos tradicionales y pola actuación de Los Gascones a les seis de la tarde. A la nueche l’escenariu del Parque Públicu va acoyer los conciertos tres grandes del folk y del punk-rock: José Manuel Tejedor actúa a les 21h, Llan de Cubel a les 22.30h y Skontra a les 00h. El ramu del festival van ponelu’l domingu Les Greques con una pinchada a les 13h y una xinta de xermandía a les 14h. L’Asociación Cultural Corri-Corri ye la encargada d’entamar esti eventu ensin ánimu de llucru que tien el sofitu del Ayuntamientu de Cabrales, de la Conseyería de Cultura, Política Llingüísticu y Turismu y de negocios del conceyu.
