El Velcro llanza “Santolaya”, videoclip cola collaboración d’Alicia Villanueva

Yá ta en toles plataformes musicales y en YouTube Santolaya“, el segundu tema qu’asoleya El Velcro. El proyectu spoken word formáu pol escritor Pablo X. Suárez y el productor Dudu García presentó’l pasáu vienres nel CSA L’Apiaderu esta obra que cunta cola collaboración de la xoven intérprete d’asturianada Alicia Villanueva. Tamién pon voz Dudu García -alter ego de Tasio– pa dar forma a una pieza que, en pallabres de Suárez, «trata de dialogar cola tonada y de recuperar la figura de Santolaya pa la modernidá».

La lletra ye un amiestu ente tres testos lliterarios: Pleitu ente Santa Olaya y la ciudá de Roma pola posesión de les caleyes del mundu de Pablo X. Suárez; Pleitu ente Uviéu y Mérida pola posesión de les cenices de Santa Olaya d’Antón de Marrirreguera -autor nel sieglu XVII de la primer obra lliteraria n’asturianu conservada-; y Coplina de la flor de la cotoya, tamién de Suárez. La pieza ta grabada nos estudios ZL Audio por Zeros Gutiérrez y el videoclip ye obra de Iván de Degaña.

“Santolaya” ye’l primer de los cuatro temes qu’El Velcro va llanzar en 2024. Ye la continuación d’un orixinal proyectu dientro de la música asturiana que se presentó públicamente en 2019 col tema “Little Babilonia” y que dende entós vien dando conciertos per escenarios de tol país.

Dexa un comentariu

X