Dempués de dos exitoses ediciones yá pue marcase nel calendariu el Válgame Fest como ún de los eventos más destacaos pa la música asturiana nel oriente del país. El pasáu sábadu 4 entamó n’Arenas (Cabrales) la tercer edición del festival con una charra de Fe Santoveña alredor de los elementos de conformación de la identidá cabraliega y la inauguración de la esposición Cabrales a vista de pájaro de Pedro Fernández. Sicasí, el platu fuerte del eventu aporta esti fin de selmana con una Nueche en Danza el vienres 10 y dellos conciertos a lo llargo’l sábadu 11.
La Bandina’l Fuelle y los Pandereteros d’Anguaño van ser los encargaos de poner son a la Nueche en Danza del vienres, que se va facer dende les 23h nel Parque d’Arenas. Al día siguiente, la xornada arranca pela mañana cola apertura del Mercáu d’Artesanos a les 11h na Plaza’l Castañéu y les actuaciones que la Bandina La Llume va dar a la una’l mediudía y a les siete la tarde. Pa la nueche, conciertos con delles de les formaciones más destacaes del folk y el rock n’asturianu: les pandereteres Algaire, la banda de folk atlánticu Felpeyu y el grupu de ska-fusión La Tarrancha van xubir al escenariu del Parque públicu dende les 22h.
Pa rematar los ocho díes de festival, el domingu 12 a les dos y media va haber una xinta de fraternidá. Nella, la xente que quiera participar namás tien que llevar un platu de comida pa compartir y amás va haber escenariu abiertu pa que xuba toa persona que quiera tocar y baillar. Toles actividaes son de baldre y tán entamaes pola Asociación Cultural Corri-Corri xunto col sofitu del Ayuntamientu de Cabrales, la Conseyería de Cultura, Política Llingüísticu y Deporte.
Suscríbite a les nuestres novedaes
