El martes 2 d’agostu de 2005 una montonera adolescentes taben a la puerta del bar Cascayu de Cimavilla esperando pa entrar nun conciertu. Yera’l Konziertu Mozu, que diba axuntar a tres formaciones punk-rock con componentes que nun pasaben de los 17 años: Adizión Etílika, Help 112 y Ásperos. El qu’esto escribe foi ún de los organizadores d’aquel eventu, que supunxo tamién l’estrenu nos escenarios del so grupu. 19 años dempués, paga la pena echar la vista atrás y facer alcordanza d’un tiempu nel que los quinceañeros entamaben grupos de rock con conciencia llingüística y social.
D’aquel Konziertu Mozu (y el so post-conciertu) surdiría l’amistá ente los componentes d’Adizión Etílika y Ásperos. Al mes siguiente, Ásperos conoceríen tamién a Gomeru, cuando compartieron escenariu con ellos na desapaecía sala Mr. Zimmerman d’Uviéu. Estos grupos formaríen una especie de triángulu musical con munches característiques en común, entamando pola publicación, más o menos al mesmu tiempu, de les sos maquetes qu’agora dixitalizamos dende l’Archivu de la Música Contemporánea Asturiana.
Ún d’estos puntos d’alcuentru yera’l de la edá; con tolos componentes nacíos ente 1986 y 1990. Otru yeren les influencies musicales; marcaes pol Rock Radikal Vascu, el rock estatal o formaciones asturianes como Dixebra o Escuela de Odio. Tamién teníen conciencia política -como amosaben nes sos lletres reivindicatives- y conciencia asturiana. De fechu cada banda tenía les sos simpatíes por dalguna organización del soberanismu asturianu: Adizión Etílika taben más venceyaos al Bloque por Asturies; n’Ásperos había militantes de Darréu y Gomeru simpatizaben con CAIS (Conseyu Asturianu Pola Independencia y el Socialismu) y paraben pel llocal nacionaliegu El Requexín d’Uviéu.
Les últimes d’estes característiques comunes ye qu’estes tres formaciones tocaríen xuntes una montonera veces pa milenta causes solidaries y polítiques y que de la so amistá nació otra banda como Fala Non Caduca, qu’axuntaba a cuatro componentes d’Adizión Etílika, ún d’Ásperos y ún de Gomeru. Amás, varios integrantes entamaríen o participaríen llueu n’otros proyectos de la música n’asturianu: Spanta la Xente, Skontra, Slum Suit… Darréu facemos un repasu per caúna d’estes formaciones, amás de poner a disposición pública les sos primeres grabaciones.
Esta formación l.leniza yera la más veterana de les tres y foi la más duradera. Formáronla en 2003 cinco rapazos que teníen ente los 13 y los 17 años. Peligro Botellón (2004) foi la so primer maqueta y nella pue sentise yá un cantar n’asturianu, “Fartos”. Llueu vendríen Heridas de Mina (2006), Del Otru Llau (2008) y Bomba Reloxería (2012); discos que reflexaron la progresiva asturianización llingüística d’esti grupu qu’acabó cantando dafechu n’asturianu.
Con un estilu más cercanu al hardcore, alredor de 2015 dieron los sos últimos conciertos y güei Carlos G. Villamil (guitarrista y últimu vocalista de la formación) toca en Skontra; Xuanín G. Villamil (batería) en Sombra y Acid Mess; Héctor Torre (baxu) en Spanta la Xente; y Adrián González ye DJ especializáu en soul, funk, jazz y disco.
En 2004 nació n’Uviéu esti grupu que s’autodefinía musicalmente como Punkcore pola independencia. De los tres foi’l más marcadamente nacionaliegu y yá dende l’entamu escoyó l’asturianu como idioma d’espresión. Grieska na cai (2005) foi la so maqueta y nella inclúise “Tuerques y torniellos”, tema que tien tamién un videoclip en YouTube. Tres dellos cambios de componentes, incorporaron pasín a pasu gaita, saxu y trompeta a la formación y asoleyaríen los discos Bales de Rabia (2008) y Llume (2010).
Desficiéronse a primeros de la década del 2010. Carlos Casado (saxu y gaita) anguaño toca en Slum Suit y con Mateo Baños (trompeta) foi tamién parte de Fala Non Caduca. Pelayo Palicio Mazetu (baxu) sigue güei tocando con Fesoria a les Ortigues y Fula (batería) fáilo en La Morgue.
Esti quintetu xixonés nació en 2004 de la povisa d’otru grupu llamáu Astaroth. Na so maqueta Rabia (2005) hai dos temes n’asturianu: “Areces ye guay” -dedicada al por aquel entós presidente asturianu- y “Yá yá yá”. El trabayu grabáronlo nel llocal d’ensayu d’Adizión Etílika baxo la producción de componentes d’esta otra formación -qu’amás collaboren nel discu-, lo qu’amuesa les interrellaciones que se daben ente estes bandes.
Con influencies del ska, amás del punk-rock y tres de grabar dalgún cantar sueltu más en castellanu y tamién n’asturianu -llingua na que s’espresaben públicamente-, dexáronlo en 2007. Xicu Ariza (guitarra) tocaría llueu en Fala Non Caduca y siguiría puxando pola música’l país entamando iniciatives como’l Fechu n’Asturies o Musicasturiana.com.
19 años dempués d’aquel Konziertu Mozu, el panorama musical y social ye mui estremao ente la mocedá. Aquellos adolescentes heredaron el llegáu que dexaron les xeneraciones anteriores: la influencia del punk-rock, ver les lluches obreres, la militancia y l’autoxestión,,. Llueu, n’Asturies, les cifres de mocedá diríen a menos, los sos intereses camudaríen y notaríense los efectos sociales, culturales, educativos, mediáticos y políticos; causando qu’anguaño falten formaciones de quinceañeros que faigan punk, folk, trap, rap, k-pop, electrolatino o cumbia n’asturianu.
Suscríbite a les nuestres novedaes
