Atendiendo un poco al panorama de la música tradicional d’anguaño n’Asturies son munches les voces que falen de que tamos viviendo un momentu de bonanza, similar al que se vivió a entamos de los años 2000 col boom a nivel nacional y internacional de la música celta (Hevia, Carlos Núñez, Luar na Lubre, Capercaillie…).
Sicasí, agora los actores son otros. Con Rodrigo Cuevas como indiscutible punta de llanza, grupos como Tanxugueiras, L-R, Baiuca o Algaire son dalgunes de les propuestes que van pisando fuerte y marcando tendencies nesta nueva fola de folk, cola pandereta como reina nun tronu que na otra fola cásique monopolizaba la gaita.
«Nesta nueva fola de folk la pandereta ye la reina nun tronu que na otra fola cásique monopolizaba la gaita»
Esti fenómenu faise notar a nivel d’enseñanza coles escueles de baille tradicional y pandereta enllenes pero, ¿ye esto un espeyismu o ye daqué que garra fuercia pa quedase? ¿Danse les condiciones a nivel socioeducativu pa qu’esti interés na música tradicional nun seya dalgo pasaxeru y nun desinfle dientro d’unos pocos años?
Si echamos un güeyu a qué tipu d’instituciones imparten enseñances de música tradicional n’Asturies podemos afirmar que’l primer puestu ocúpenlu les asociaciones culturales; entidaes qu’abelluguen escueles de gaita, tambor, pandereta, baille y dacuando, en menor midía, d’otros instrumentos. Tán enfocaes la mayor parte en nutrir de componentes a bandes de gaites y grupos de baille. Ye dicir, trátase d’entidaes que saquen alantre la so actividá con munchísimu esfuerzu tantu humanu como económicu, siendo subsidiaries en munchos casos de les ayudes públiques pa esti fin, cola incertidume qu’eso implica d’añu n’añu.
«Les principales entidaes qu’enseñen música tradicional son les asociaciones culturales y lo faen con munchísimu esfuerzu humanu y económicu, dependiendo d’ayudes públiques y con incertidume»
A esto hai que suma-y un contestu nel que les escueles de música municipales n’Asturies tán perdiendo puxu na mayoría de conceyos, siendo desmantelaes o “dexaes morrer” por mor de criterios de déficit económicu y dexando nun recuerdu llonxanu aquellos años doraos qu’esos centros vivieron fai dos décades.
Poro, les oportunidaes pal deprendimientu van menguando y vese un fuerte desequilibriu ente conceyos d’Asturies; con una ufierta mayor nos conceyos más poblaos del centru (escueles, conservatorios, asociaciones, etc.) mientres que nuna montonera de llugares queda de mano de xente entusiasta que dende’l senu d’una asociación faen por caltener viva esa estaya cultural.
Con esti panorama, la profesionalización de los docentes especializaos ye bien abegosa, siendo habitual que muncha xente talentosa camude pa otres profesiones con meyores espectatives llaborales y económiques.
«Les escueles municipales tán perdiendo puxu, siendo desmantelaes o “dexaes morrer”. Con esti panorama, la profesionalización de los docentes especializaos ye bien abegosa, siendo habitual que muncha xente camude pa otres profesiones con meyores espectatives llaborales y económiques»
Falando con delles persones que se dediquen a la enseñanza de la música tradicional, un comentariu bastante común (anque tamién hai escepciones, por supuestu) ye que’l perfil del alumnáu interesáu en deprender música y baille tradicional ye de persones adultes, más que neñes y neños. Esti fenómenu ye más fácil de rastrear en poblaciones más pequeñes que nes grandes ciudaes, onde l’accesu a públicu oxetivu ye más fácil, pero paez qu’hai una tendencia a que cada vez menos neñes y neños entamen a deprender música tradicional. Onde esto nun asocede paez que ye nel entornu d’escueles y asociaciones que tienen unes circunstancies (personal, contautu, disponibilidá, usu d’instalaciones) que-yos permiten tar en relación directa con centros escolares.
Dicho too esto, paez nidio’l fechu de que’l relevu xeneracional ta necesariamente venceyáu a la presencia de la música tradicional nos centros educativos, entendiendo esta presencia como la inclusión nel currículu, especialmente de l’asignatura de música pero tamién de manera tresversal; cola introducción de la música tradicional na ufierta d’actividaes extraescolares de los centros o la programación d’actividaes extracurriculares relacionaes cola música y la cultura tradicional (fuera del yá tradicional “Día del Amagüestu”).
«Hai una tendencia a que cada vez menos neñes y neños entamen a deprender música tradicional y paez nidio’l fechu de que’l relevu xeneracional ta necesariamente venceyáu a la presencia de la música tradicional nos centros educativos»
Vamos analizalo per partes. Si consultamos el Decreto 57/2022, de 5 de agosto, por el que se regula la ordenación y se establece el currículo de la Educación Primaria en el Principado de Asturias, podemos ver cómo se prevé la presencia de la cultura tradicional asturiana de manera tresversal a lo llargo de tola Educación Primaria, entendiendo que’l contestu inmediatu ye l’idóneu pa l’adquisición de deprendizaxes.
Vamos llanzar una primera propuesta. L’asignatura de Música vien emplegando davezu la flauta dulce como instrumentu col que trabayar un primer acercamientu a la música instrumental, xunto a los habituales equipos d’Orff que tolos colexos tienen. ¿Por qué non plantegar la sustitución d’esta flauta dulce por flautes con dixitación de gaita asturiana? El coste pa les families nun sedría mayor, les diferencies de dixitación pa la dificultá de los conteníos de Primaria son más qu’asumibles y taríamos ufriendo a miles de neñes y neños asturianos un primer acercamientu al instrumentu más identificativu de la nuestra música tradicional. La implantación d’un proyeutu pilotu pa esta cuestión sedría enforma fácil y con un coste irrisoriu, más teniendo en cuenta la cantidá de mayestres y mayestros asturianos de Primaria que toquen o tocaren la gaita, baillen o tán venceyaos d’una manera u otra al mundu de la música tradicional.
«Na asignatura de Música, ¿por qué non plantegar la sustitución de la flauta dulce por flautes con dixitación de gaita asturiana? Taríamos ufriendo un primer acercamientu al instrumentu más identificativu de la nuestra música tradicional y la implantación d’un proyeutu pilotu pa esta cuestión sedría enforma fácil»
La segunda propuesta sedría una ufierta xeneralizada y seria d’estraescolares de música tradicional: Gaita, tambor, baille y pandereta, por entamar por dalgo, con profesoráu capacitáu pa trabayar cola reciella. Esta estaya paezme fundamental y la que más beneficios traería ensin dulda dalguna. Nun hai más que mirar pal mundu del deporte y la implantación que tien nes estraescolares y cómo esto fai de base pa los clubs deportivos, eventos y demás cuestiones rellacionaes.
La enseñanza d’estraescolares ye una vía que permitiría la profesionalización de decenes de persones en toa Asturies, qu’ufriríen un primer acercamientu a la música y baille tradicional a miles de neños cada cursu académicu. La esistencia d’estes estraescolares nutriría a la so vez les escueles de música tradicional, permitiendo a los profesores d’estes especializase n’otros niveles d’enseñanza, meyorando la calidá y el nivel de les enseñances nestes escueles.
«Una ufierta xeneralizada y seria d’estraescolares de música tradicional permitiría la profesionalización de decenes de persones en toa Asturies, qu’ufriríen un primer acercamientu a la música y baille tradicional a miles de neños y neñes»
Y yá ensin llegar a esto, la mera esistencia de l’actividá camudará la sensibilidá y respetu d’eses nueves xeneraciones pa cola cultura tradicional, sintiéndolo como dalgo cercano y propio, continúen o non cola práctica dempués de pasar pela estraescolar. Podemos ver esperiencies similares n’otres Comunidaes Autónomes como Euskadi, Catalunya o Baleares, por non falar d’otres realidaes del Arcu Atlánticu como puen ser Escocia, Bretaña o Irlanda.
Estos programes d’estraescolares tamién seríen impulsu pa los facedores d’instrumentos asturianos, que podríen desendolcar llabor construyendo flautes, gaites, caxes sordes, palillos o panderetes enfocaes a esti tipu de clases. Nel casu de les gaites y flautes, les impresores 3D ofrecen nueves posibilidaes a la hora de fabricar instrumentos a un coste económicu más que razonable.
Pa desendolcar esta propuesta cabe plantegase una formación específica a nivel pedagóxicu pa les persones qu’impartan estes actividaes, al igual que se fai en campos relativamente próximos, como pue ser l’animación sociocultural. Esta formación tamién crearía empléu, amplía la ufierta llaboral venceyada a la música tradicional y dotaría a los centros de personal cualificáu pa impartir esi primer nivel d’enseñanza de música y baille, del que tamién podríen beneficiase otres instituciones d’enseñanza informal, como les asociaciones culturales.
«Esto camudará la sensibilidá y respetu d’eses nueves xeneraciones, que lo sentiríen como dalgo cercano y propio. Amás sería un impulsu pa los facedores d’instrumentos y plantegando una formación específica crearíase empléu»
Por últimu, otra cuestión que me paez importante de cara a algamar una mayor difusión d’esti tipu de música ente la mocedá ye emplegar los canales de comunicación y de consumu de música qu’emplega la xente mozo. De nada sirve cuntar con oferta educativa, circuitos de música profesionales o publicaciones de trabayos discográficos si tou esi potencial nun llega a ser recibíu pola mocedá, y habrá qu’atopar les fórmules adecuaes pa frañer la barrera existente ente les formes de producción de la música tradicional anguaño y les maneres de consumir música que tien la mocedá.
Ta claro que naide nun tien respuestes absolutes pa estes problemátiques tan complexes, pero lo que sí que ta nidio ye que si entamamos a planteganos esti tipu de cuestiones, tenemos más probabilidá d’atopar caminos y soluciones qu’ayuden a que la música tradicional gocie de bona salú a llargu plazu, ensin depender de foles o modes puntuales. Qu’estes llinies sirvan como un granín d’arena más pa construyir un futuru sólidu pa la música de nueso.
Suscríbite a les nuestres novedaes
