«En “Siguiendo’l Camín d’Iturralde” garramos el testigu de “Etnofonías” y repasamos los soníos del Camín de Santiagu»
Esti sábadu 4 d’avientu, a les 19h, nel Casinu de Llanes, el grupu de jazz de raigañu Slum Suit estrena’l so nuevu espectáculu “Siguiendo’l Camín de Pedro Iturralde”. Iturralde foi ún de los pioneros y iconos del jazz español, qu’en 1999 entemeció jazz con música popular en ‘Etnofonías‘, un discu nel qu’homenaxea al Camín de Santiagu y nel que destaquen pieces como la de “Vaqueiras Asturianismo“.
«En “Siguiendo’l Camín d’Iturralde” garramos el testigu del discu “Etnofonías” y repasamos los sonios del Camín como nos imaxinamos qu’Iturralde diba facelo. Con composiciones propies, populares y dalguna cosina del mayestru Pedro que llevaremos pel Camín, dende Asturies a Santiagu, a la Catedral y a la sala Dado Dadá, onde se grabó “Etnofonías”», comenta’l gaiteru y saxofonista Carlos Casado, cabezaleru de Slum Suit, sobre’l so nuevu espectáculu.
Casado lleva dende que fundó Slum Suit trabayando por fusionar composiciones basaes na tradición asturiana con ritmos modernos y estilos de músiques del mundu como’l jazz. Por eso nun ye d’estrañar que nesti espectáculu homenaxee «a ún de los saxofonistas que marcaron el camín». «”Etnofonías” marcóme. foi de los primeros discos jazz que teníen un llinguaxe de la música popular que yo conocía y cuando morrió Iturralde apetecíame face-y un homenaxe dende’l respetu», añade’l músicu uviedín sobre esti espectáculu que s’estrena gracies a la convocatoria pa conmemorar el Xacobéu qu’abrió’l ciclu Asturies Cultura en Rede, de la Conseyería de Cultura, Política Llingüística y Turismu. La entrada ye de baldre y yá se pue sacar n’Eventbrite.
