La proyección del documental de Berto Turulla completa la programación de los Alcuentros de Músiques Asturianes

Esti martes 30 de payares arranquen en Xixón la novena edición de los Alcuentros de Músiques Asturianes. Amás de los conciertos d’Algaire, Nun Tamos Toes, Odón del Paganéu y los llioneses Rodrigo Martínez Trío, súmase a la programación la proyección del documental dedicáu al históricu músicu xixonés fináu en 1983 Berto Turulla. Va ser el 4 d’avientu a les 19h nel Centru de Cultura Antiguu Institutu.

Tres del parón en 2020 por culpa del andanciu, la Fundación Municipal d’Educación y Cultura de Xixón vuelve a organizar los Alcuentros de Músiques Asturianes. La novena edición d’esti ciclu va durar del 30 de payares al 10 d’avientu y nél van tocar Algaire, Nun Tamos Toes, Odón del Paganéu y los llioneses Rodrigo Martínez Trío. Les actuaciones van ser nel Centru de Cultura Antiguu Institutu, nel CMI d’El Coto y nel Atenéu de La Calzada.

«Esti ciclu busca visibilizar la música que se fai anguaño n’asturianu (sintiendo a intérpretes del centru, oriente y occidente d’Asturies y del Sur del Cordal) y que, partiendo de la música tradicional, busca nuevos caminos de renovación, fundiendo tradición y modernidá», comenten dende la estaya de Cultura de Xixón. El programa arranca’l 30 de payares a les 19.30h nel Antiguu Institutu col conciertu del intérprete de tonada renovada Odón del Paganéu, que va presentar el so primer discu ‘Orbeiru‘. L’actuación d’esti cantador xunto a una banda d’otros seis renomaos músicos va repetise el 9 d’avientu a les 19.30h nel Atenéu de La Calzada.

El 1 d’avientu nel Antiguu Institutu a les 10.30h y 2 d’avientu nel Atenéu a la mesma hora va ser el turnu de Rodrigo Martínez Trío.. Estos tres músicos ellaboren un repertoriu basáu en pieces de la tradición lleonesa dende una óptica más contemporánea. Al día siguiente, 3 d’avientu a les 19.30h, la formación feminista de percusión tradicional Nun Tamos Toes va llevar les sos lletres reivindicatives interpretaes sobre cantares tradicionales al CMI d’El Coto.

El sábadu 4 d’avientu a les 19h nel Centru de Cultura Antiguu Institutu va proyectase ‘l documental “Berto Turulla (1957-1983)”. Con dellos testimonios, entrevistes, audiovisuales como’l conciertu homenaxe nel que participaron Miguel Ríos, Víctor Manuel,  Nuberu, Jerónimo Granda, Latin Show, Julio Ramos, Carlos Rubiera, Alcotán, o Cuélebre; el documental  reconstrúi la trayectoria d’esti músicu xixonés, componente de grupos como Cuélebre y collaborador davezu de los cantantes del Nuevu Canciu Astur.

El ramu d’estos Alcuentros de Músiques Asturianes van ponelo Algaire. La banda de voces, guitarra y percusiones tradicional va llevar el 10 d’avientu al escenariu del Antiguu Institutu los cantares que van formar el so primer discu ‘Coral y Maera‘, y nos que la música tradicional suena rellaborada con una perspectiva más actual.

Comprar discos folk na tienda online