Dempués de l’axitada axenda d’estes últimes selmanes, esti fin de selmana d’agostu asela l’actividá de la música n’asturianu en vivo. Namás hai cuatro cites repartíes ente l’occidente, centru y oriente’l país: el Mercao de Somiedo, que continúa güei coles actuaciones de Los Gascones (12h), la muestra ‘Ente tonaes y cancios’ (20h) y Pandereteras de Somiedo; una puesta n’escena nueva del espectáculu Resollu de la Banda Gaites Llacín; el conciertu que da Taragañu na sala Gong d’Uviéu; y Anabel Santiago en Caravia. Música tradicional, folk y punk pa esta nueche de vienres.
12:00 — Mercao de Somiedo
La Pola Somiedo
La programación del vienres entama cola actuación de Los Gascones a les 12 hores. A les 20 hores va celebrase la muestra ‘Ente tonaes y cancios’, acompañada pola actuación de Pandereteras de Somiedo.
20:00 — Taragañu
Sala Gong Galaxy Club (Uviéu)
Taragañu ye una banda formada por componentes que vienen de grupos como Desaniciu, Sin Emu, Tygers of Wrath o Bristol Bulldogs y que ta influenciada por estilos que van del street punk y el Oi! al metal y el hardcore.
22:30 — Resollu
Parking d’El Sablón (Llanes)
La Banda Gaites Llacín interpreten el so discu nuevu, Resollu, nun conciertu perespecial nel que van participar los sesenta componentes d’esta formación xunto con una trentena de músicos y danzantes ente los que s’inclúin dalgunos de los nomes más destacaos del folk asturianu. Nesta cita tamién van tocar Felpeyu.
20:00 — Anabel Santiago
Plaza de Caravia Alta
Anabel Santiago ye la cantante actual de tonada más reputada y popular, amás d’una renovadora d’esti xéneru musical. Nesti espectáculu actúa en formatu cuartetu.
Esta programación ta recopilada a partir de los datos publicaos na axenda de Musicasturiana.com, onde pue consultase más información, horarios actualizaos y llocalizaciones precises pa cada eventu
Consulta la axenda completa equí: https://musicasturiana.com/axenda/lista/
Suscríbite a les nuestres novedaes
