Otru añu más aporta esti 13 y 14 d’agostu a La Pola el Mercao de Somiedo, eventu que cada añu axunta delles actividaes musicales, lliteraries y d’artes escéniques, amás de los propios puestos d’artesanía y gastronomía que formen el mercáu. La música n’asturianu va tener protagonismu abondo dientro la programación con cinco conciertos de música tradicional: Bandina Los Eólicos, Pandereteros d’Anguañu, Los Gascones, la muestra ‘Ente tonaes y cancios’ y Pandereteras de Somiedo.
El xueves 13 la programación arranca a les doce la mañana cola apertura del mercáu y yá dende esi momentu la Bandina Los Eólicos de Tinéu va tar animando esti espaciu asitiáu na capital somedana. Tres de la celebración d’otres acitividaes gastronómiques y pa la reciella, los conciertos vuelven a les ocho la tarde cola actuación de Pandereteros d’Anguañu, tríu de música tradicional qu’apuesta por renovar la tradición con unes lletres actuales y crítiques.
El vienres 14 ye la bandina popular Los Gascones quien van tocar pel mercáu dende les 12h. La música’l país vuelve pela tarde cola muestra Ente tonaes y cancios, entamada pola Asociación d’Intérpretes de Canción Asturiana (AICA) y na que participen Belén Arboleya a la gaita, Fermín García al tambor y los cantadores Lorena Corripio y César González. La programación zárrase llueu cola actuación de Pandereteras de Somiedo.
Con esti programa, el Mercao de Somiedo sigue puxando pola música asturiana tradicional axuntándola a un bayurosu programa pa tolos públicos que fai que los sones del país s’espardan per esta fastera d’Asturies.
Suscríbite a les nuestres novedaes
