Del 20 al 23 de xunetu Candás va acoyer la ventiséis edición del Festival de Bandes de Gaites Villa de Candás. Nél va haber mercáu tradicional; conciertos folk de Deira, Los Gascones, Cerezal y Algaire; concursos; y pasacais, desfiles y actuaciones de les bandes de gaites asturianes Conceyu Grau, Candás y Escolinos de la BG de Candás, la gallega Xarabal y la bretona Kevrenn Brest Sant Mark. Too ello de baldre y con la Plaza La Baragaña y el Parque Les Conserveres como escenarios principales.
La programación entama’l xueves 20 cola inauguración del mercáu tradicional y los pasacais y conciertos de la Banda Gaites Candás (19.15h) y la Kevrenn Brest Sant Mark (20h). El vienres 21 a les 13h desfila y actúa la Bandina d’Escolinos BG Candás, repite la banda bretona y actúa la BG Xarabal. Esa nueche toles bandes participantes van desfilar a les 23h pa dar pasu a los conciertos na Plaza La Baragaña: Deira a les 00.30h y Los Gascones a les 02h. Amás, dempués d’esta última actuación, hai escenariu abiertu pa quien quiera xubir a tocar.
El sábadu 22 repiten les sos amueses la Kevrenn Brest Sant Mark (13.30h y 19h) y Xarabal (19.30)h. La BG del Conceyu Grau fai pasacais y conciertu a les 20h y a les 23h toles bandes axúntense nel Parque Les Conserveres pa la celebración del XXVI Festival de Bandes de Gaites Villa de Candás. La xornada remátenla Cerezal, que van llevar el so folk-pop al escenariu de La Baragaña.
Concursos y Algaire
Dos competiciones protagonicen la última xornada d’esti veteranu festival: a les 13.30h celébrase’l VIII Concursu de Cuerpos de Percusión y a les 18h el VIII Concursu de Pareyes de gaita y tambor Memorial Diego Alonso. Tres de la entrega de premios y pa poner el ramu al festival actúen a les 20.30h el cuartetu de música tradicional fusionada Algaire.
Suscríbite a les nuestres novedaes
