La Federación de la Música d’España (Es_Música), entidá que representa y promueve los intereses colectivos de más de 125.000 profesionales y empreses del sector de la música nel Estáu español presentó esta selmana en rueda prensa les propuestes esenciales pa que’l próximu gobiernu que salga de les elecciones del 23 de xunetu aproveche la «oportunidá histórica» qu’anguaño se-y presenta pa la industria musical estatal, un sector qu’aporta de manera directa cerca del 1,5% del PIB del Estáu (ensin cuntar l’impactu indirectu n’otros sectores.
Trátase d’una serie de propuestes que salieron d’un estudiu estratéxicu desendolcáu pol propiu sector y que sirva pa esplotar toles fortaleces qu’hai anguaño como la calidá de los artistes y profesionales o la ufierta de festivales y conciertos que fai d’España’l primer destín de turismu musical del mundu. Defendiéronles representantes de dellos subsectores de la música (dende la grabada y la d’en vivo a les editoriales y sociedaes de xestión de derechos), afitando que ye imprescindible cuntar con mayor apoyu institucional y que’l gobiernu considere a la música como un sector estratéxicu y apueste por aprovechar tol so potencial como yá se fai n’otros países.
Como midida principal propónse la creación d’una Dirección Xeneral de la Música, pa planificar y executar les polítiques necesaries que, en collaboración pública-privada, faigan del Estáu español una potencia musical a nivel mundial. D’esta manera equipararíase a la música con otros sectores culturales como’l llibru, l’audiovisual, el teatru o la danza, que sí cunten con direcciones xenerales o institutos específicos.
Observatoriu, incentivos, capacitación y internacionalización
Plantegóse tamién crear un Observatoriu de la Música pa tener toles cifres y información clave sobre’l sector musical y asina tener una perspectiva de la influencia real y poder facer estudios sobre sostenibilidá, impactu medioambiental o salú mental en profesionales de la música. Tamién defendiéronse incentivos fiscales pa la producción fonográfica (tomando como exemplu los modelos de Francia y Italia) y la revisión y les meyores de los límites de les deducciones fiscales previstes pa la música en vivo.
Amás d’esto espusiéronse otres midíes rellacionaes cola capacitación profesional y capital humanu, abarcando dende la formación hasta la promoción de la igualdá, diversidá y inclusión, asina como’l desendolque del talentu creativu. Per último, afalóse a la internacionalización de la música española, a traviés de la so promoción y difusión nel mercáu global, asina como la dinamización d’oportunidaes de negociu y collaboración pa les empreses del sector.
Suscríbite a les nuestres novedaes
