Yá queda menos d’un mes. El sábadu 22 de payares nos Kuivi Almacenes d’Uviéu torna una de les cites imprescindibles cola música asturiana dende hai más de trés décades: el Conciertu Pola Oficialidá. La Xunta Pola Defensa de la Llingua Asturiana ta acabante d’anunciar el cartelu completu de la XXXII edición d’esti eventu nel qu’anguaño van participar Alienda, Herbamora, Dixebra y Llevólu’l Sumiciu y pal que yá tán a la venta les entraes.
«La organización ta ilusionada de volver a facelo dempués d’unos años de parón y pa nós supón sobre manera’l volver a ver les cares de la xente qu’a lo llargo de munchos años participó y foi al conciertu», desplica Carlos Pulgar, voceru de la Xunta Pola Defensa de la Llingua Asturiana, en rellación a la vuelta d’esti festival siete años dempués de que Xixón acoyera’l XXX Conciertu Pola Oficialidá y seis desque la XPDLA entamara nel Teatru Palacio Valdés d’Avilés l’espectáculu La Banda Sonora de la Oficialidá.
Na vuelta d’esti festival míticu de música y reivindicación llingüística, la organización apostó musicalmente por «una escoyeta de grupos variaos dende’l puntu de vista de la representación de los tipos de música que toquen, pa que puean gustar al máximo númberu de xente posible», comenta Pulgar. Asina ye como dende les ocho la tarde va haber folk con Alienda, música tradicional con Herbamora, rock con Dixebra y electrónica con Llevólu’l Sumiciu.
El Conciertu Pola Oficialidá vuelve amás con un formatu nuevu; va ser nun espaciu cultural que tien una sala de gran aforu en cuenta de nuna carpa asitiada nun espaciu públicu, como foi les más de les veces. El voceru de la XPDLA desplica que yá cola edición de 2018 llegaren a un «momentu de reflexón del modelu del conciertu». «Afitar instalaciones en conceyos cada vez resultaba más complicáu y poníen más pegues«, plantega Pulgar, sorrayando qu’esta cuestión, amás del andanciu, foi lo que «traxo esti parón» de siete años.
Dende yá mesmo pueden mercase les entraes pa esti eventu na web Kuivialmacenes.es, n’El Cabanón (Avilés), La Raposa (Uviéu), L’Esperteyu (Uviéu) La Revoltosa (Xixón) y Trisquel (Xixón). La llaparada yá ta encesa pa esta cita que, según tresmite esti militante de la Xunta Pola Defensa de la Llingua Asturiana, tien un oxetivu mui claro: «probar con un modelu de conciertu que furrule bien nestos tiempos y volver a les cares de la xente qu’a lo llargo de munchos años vino y tamién ver si xeneraciones nueves que por cuestiones d’edá nun participaron nes últimes ediciones, s’averen al conciertu y a la reivindicación de la oficialidá«.
Suscríbite a les nuestres novedaes
