Hai un añu que La Bonturné ganó’l XVI Premiu Camaretá al Meyor Cantar n’asturianu col tema ‘Odisea La Nuí’. Ente los distintos premios ta la realización d’un videoclip y esti xueves va estrenase esta obra audiovisual. Llaboral Ciudá de la Cultura va acoyer a les 11.30h una rueda de prensa pa presentar esta creación del realizador Javier Lueje y, n’acabando l’actu, va estrenase na canal de Musicasturiana.com.
El cantar ‘Odisea la Nuí’ ye una reinterpretación del poema homéricu na que Penélope asume’l papel protagonista. La historia surde d’un relatu curtiu del escritor asturianu Paco Álvarez, al que’l músicu David Varela –voz y acordión diatónica de La Bonturné- afixo lletra y punxo música. Va incluyíu nel trabayu discográficu A Contraforga que la formación bal-folk asoleyó en 2023.
El videoclip, discurríu y realizáu por Javier Lueje, cunta amás cola collaboración del iluminador Víctor Vivar, el maquillaxe d’Andrea Trabanco y el llabor de Rubén Arena como operador de cámara. Na parte escénica rescampla la participación de Etymos Danza, dirixíos por Candela Guerrero, con una interpretación qu’amuesa una gayolera dimensión visual y simbólica a la hestoria. El rodaxe tuvo llugar nel espaciu escénicu La Benéfica, en L’Infiestu (Piloña), una contorna bien apañada pal desendolcu técnicu y tamién emocional del relatu audiovisual. Pel momentu pue vese un teaser adelantu d’esta obra.
L’actu de presentación del videoclip d’esti xueves a les 11.30h en Llaboral Ciudá de la Cultura va cuntar cola presencia d’Antón García, Director Xeneral d’Acción Cultural y Normalización Llingüística del Gobiernu d’Asturies; Javier Lueje, Director y Realizador del videoclip; y representantes de La Bonturné. Tres del so estrenu oficial, el videoclip va estrenase a traviés de la canal de YouTube de Musicasturiana.com, onde’l públicu va poder esfrutar d’esti nuevu trabayu qu’entemez música, narrativa con sorna y danza, característiques d’éstos habituales na escena artística asturiana
La Bonturné ye un cuartetu bal-folk formáu polos veteranos músicos David Varela (voz y acordión diatónicu), Merce Santos (zanfona), Santi Caleya (saxo sopranu) y David Casillas (contrabaxu). Gracies a algamar el XVI Premiu Camaretá actuaron per una ventena d’escenarios del tol país, consolidando la so trayectoria dientro de la música de raigañu contemporáneu. Cola publicación d’esti videu, dan un paso más na so trayectoria y contribúin al crecimientu d’obres audiovisuales musicales n’asturianu.
Suscríbite a les nuestres novedaes
