El pasáu 5 de febreru finó n’Avilés Damián Barreiro Maceiras (A Estrada, 1984), periodista y ensayista referente na cultura asturiana, amás de militante de la Xunta Pola Defensa de la Llingua Asturiana. Pa facer alcordanza d’una persona fundamental y queridísima dientro del asturianismu, el colectivu nel que militaba entama güei, vienres 2 de mayu, na Casa la Cultura d’Avilés l’actu Universu Damián, nel que «va haber alcordances, amigos y amigues… y música en directo«, como avancen dende la XPDLA. L’actividá entama a les 19.30h y la entrada ye llibre hasta enllenar l’aforu.
«Ta fechu por xente que queríemos a Damián y que vamos recordalu a la so manera: con toles coses qu’a él-y gustaben y sobre les qu’escribía y pa les que militaba«, comentó’l colectivu de reivindicación llingüística nes sos redes sociales. D’esta manera, van xubir al escenariu dellos artistes que representen perbién esi «universu Damián»: l’axitador folclóricu Rodrigo Cuevas; la gran cantadora Mariluz Cristóbal Caunedo; el DJ d’electrónica de raigañu Fruela 757; el grupu de música tradicional fusionada Algaire; el gaiteru Llorián García Flórez; y l’acurdionista y cantante Beatriz. Tamién va tar l’actriz Natalia Suárez Ríos.
A la fin, va haber cultura pop y de raigañu, tresgresión, identidá, diversión y país pa facer alcordanza d’una persona que tenía toes estes cuestiones nel so ADN y pal que se va facer alcordanza nesti actu «fechu d’amistá», como despliquen dende la Xunta Pola Defensa de la Llingua Asturiana.
Llicenciáu en Periodismu pola Universidá del País Vascu, Damián Barreiro foi ún de los periodistes referenciales de los medios de comunicación n’asturianu, amás d’un reconocíu ensayista, tando especializáu en cuestiones rellacionaes cola cultura asturiana. Como periodista exerció n’Asturies.com, en Les Noticies y dende va años n’Europa Press. Yera miembru del conseyu de redacción del Anuariu de la Música Asturiana y tien collaborao con Musicasturiana.com, ente otros medios de comunicación.
Foi’l creador de la canal de YouTube Horros y Frixuelos nel qu’analizaba la cultura asturiana dende la so particular perspectiva pop, aportando un gran valir a los estudios sobre la identidá’l país. Nesti sen, conceptos anguaño usaos como’l de pop llariegu, son autoría d’él.
Como ensayista tien ganao tres vegaes el Premiu Máximo Fuertes Acevedo d’Ensayu que convoca’l Principáu d’Asturies gracies a les obres Asturploitation; Caleya Sésamu: el papel de la televisión na tresmisión interxeneracional de la llingua; y Asturianía kitsch: decálogu de la cultura pop astur. Tamién algamó’l premiu d’ensayu Fierro Botas que convocaba’l Conceyu de Xixón con L’espeyu onde miranos. Televisiones de proximidá n’Europa Occidental y procesos de recuperación identitaria. Amás, publicó’l llibru Yo la to llingua, un repasu a la historia del asturianu escrito pa un públicu xuvenil.
Al marxe del so gran llabor como periodista y analista de la cultura asturiana dende una perspectiva mui necesaria, Damián tamién tenía una gran personalidá y una calidá humana que fai que munchísima xente lu quixera. Güei vienres 2 na Casa la Cultura d’Avilés va amosase tou esi ciñu y homenaxear tolo que Damián foi, ye y siguirá siendo.
Suscríbite a les nuestres novedaes
