Les II Xornaes Castreñes de Xixón, entamaes polos Museos Arqueolóxicos de Xixón van contar con dos conciertos de música folk pa poner el ramu a la programación d’esta segunda edición. Entós va actuar el sábadu 24 d’ochobre, mientres que Rollu Folk va facelo’l domingu 25, dambos conciertos a les 13.00 hores nel Parque Arqueolóxicu-Natural de La Campa Torres.
Entós ye un tríu folk asturianu que nació en 2022 col envís d’aportar la so propia visión a la música tradicional con un repertoriu que xune pieces de raigañu tradicional y composiciones propies. La so propuesta busca establecer un diálogu ente la tradición y les sonoridaes contemporánees y agora presenta la so nueva formación.
Pela so parte, Rollu Folk ye un quintetu fundáu en 2024 que trabaya con temes de la tradición asturiana y de la Europa atlántica. La formación propón una actuación participativa na que’l públicu puede sumase a la música baillando, cantando o tocando.
Los conciertos van ser la última actividá de les xornaes, que mientres el sábadu y el domingu van desenvolver tamién visites guiaes al yacimientu arqueolóxicu y el taller «Construir con madera y barru. Arquiteutura y arqueoloxía esperimental», impartíu pol arquitectu Macario Iglesias. Tanto les visites como’l taller van permitir averase a la historia y a les formes constructives de los antiguos asentamientos castreños.
Suscríbite a les nuestres novedaes
