Dempués del cuidadísimu y exitosu conciertu que dieron el sábadu pasáu nel IV Semando Fest, Entós nun aparen. El tríu xoven de folk de cámara formáu hai poco más d’un añu por Celia Nieto -vigulín (Corquiéu, Draque)-, Javi Menéndez -guitarra/bouzouki (La Garrapiella)- y Adrián Argüelles -xiblata (La Garrapiella, L.lueñe), va llevar la so propuesta a Andalucía esti fin de selmana con dos conciertos n’Almería enmarcaos dientro del ciclu Clasijazz Rural.
Estes dos feches súmanse a la xira qu’entamó n’abril de 2025 esti grupu y que los llevó a dar trece conciertos hasta la fecha ente los que llama l’atención que la metá d’ellos ficiéronlos fuera d’Asturies. La sala gallega A Gramola, el festival Folkomillas de Cantabria, el Festival internacional do mundo celta d’Ortiguera, el Folkezblai d’Ermua y Alcobendas fueron dalgunos de los escenarios nos que’l tríu actuó: «Esto ye dalgo que sorprendiónos a nós los primeros, y amuesa que la música asturiana presta tamién fuera«, desplica Javi Menéndez.
«Pa nós tocar fuera d’Asturies ye dalgo arriquecedor pa probanos con xente que nun tien por qué conocer los temes nin la nuesa música y conectar con otros públicos. Dalgunos tresmítennos que ven una forma d’averase a la música d’Asturies, que tamién ye dalgo importante pa tolos que facemos estaya«, añade’l bouzukista y guitarrista.
Amás, Menéndez destaca que «siendo un grupu mozu, ye un lluxu entamar el defendiendo’l proyectu n’escenarios tan estremaos, coincidiendo en festivales y ciclos con otru tipu de formaciones y proyectos», a lo qu’añade que ye tamién «una responsabilidá» amás de «la gasolina» que necesiten «pa siguir trabayando». «Nun hai como andar pa deprender qu’hai ganes de conocer la nuesa cultura», sentencia’l componente d’Entós, que yá ta faciendo les maletes pa viaxar p’Almería colos sos compañeros esti fin de selmana.
Entós presentóse públicamente n’ochobre de 2024. Esti tríu de virtuosos músicos propón la so visión personal de la música asturiana de raigañu, mesmo con igües y versiones de temes tradicionales como coles sos propies composiciones, influenciaes por DRD, Talabarte o Kornog, ente otros. N’abril de 2025 llanzaron la so primer referencia discográfica; l’EP homónimu entós qu’inclúi el single ‘Barro‘, votáu como’l séptimu meyor cenciellu de 2025 polos y les llectores de musicasturiana.com.
Suscríbite a les nuestres novedaes
