Son les 18.30h en Lata de Zinc. Tomes una kombucha mientres quedes con un collaciu -col que tiempu atrás compartiste post-conciertos de desenfrenu– pa conocer al segundu de los sos fíos. Llueu cenes con otres amigues y la conversación son les maternidaes. Bebes agua con gas. Vete asina ye la confirmación de que, definitivamente, yá nun yes xoven y que tuvo tol xacíu dar el relevu na dirección del Semando Fest, el festival de música moza n’asturianu, a Raúl Alonso y Yedra Riesgo d’Héroes Ensin Nome, una década más nuevos y a los que-yos queda mocedá abondo per delantre. Son les 21.05h y tas baxando les escaleres de Lata de Zinc pa ver l’arranque d’esti IV Semando Fest, el primeru que vives disfrutándolo dafechu como públicu en cuenta de tar pendiente como organizador. Acertada decisión.
Batallines y relevos aparte; a la cuarta edición d’esti yá consolidáu festival caracterizáronla dalgunes cuestiones mui destacaes. La primer d’ella ye que tolos artistes que tocaron -Lucía Rojo, Entós, Rellume y PVXARRA- son proyectos musicales que surdieron nel últimu añu y qu’enantes dieren pocos conciertos, lo que confirma’l relevu xeneracional na escena y el nacimientu de propuestes nueves. La segunda ye que foi la edición na que más públicu xoven hubo: el 40% de les entraes mercáronles xente menor de 26 años, un porcentaxe muncho más alto que n’anteriores ediciones. La tercera ye qu’esi públicu yera mui distintu al que suel vese notros eventos de la música’l país; casique nun había nin asturianistes de pedigrí, nin militantes asamblearios de milenta causes, nin llicenciaos en baille y pandereta. Cunté menos d’una decena de cares conocíes -de millenials parriba- d’eses que topabes/topes en tolos Conciertos Pola Oficialidá; daqué guapo y feo al empar. Al marxe d’esto, el IV Semando Fest caltuvo la identidá de toos estos años: artistes y equipu organizativu mozu; perspectiva de xéneru -8 muyeres y 6 homes enriba l’escenariu-; reivindicación nos discursos de los presentadores y grupos; y diversidá musical.
«A la edición nueva d’esti yá consolidáu festival caracterizáronla dalgunes cuestiones mui destacaes: tolos proyectos musicales que tocaron surdieron nel últimu añu, foi la edición na que más públicu xoven hubo y esti yera mui distintu al que suel vese notros eventos de la música’l país»
La primera en xubir a escena foi Lucía Rojo. Esta cantadora ventipocoañera lleva pisando escenarios dende los 9 añinos; sicasí, venía a dar la so segunda actuación nun formatu qu’estrenó a finales de 2025 pal festival Artístiques y qu’impulsó el qu’esto escribe: el de l’asturianada electrónica xunto a Fruela 757. Asina ye como interpretó les trés pieces -con lletres de Marina Pangua, d’Ánxela Gómez d’Ávila y de la propia cantadora, y música del mentáu Fruela 757- creaes a costa fecha pa esi eventu qu’entamó Puru Remangu y Ixuxú Cultura. Más allá de la electrónica, Lucía Rojo tamién echó trés cantares a capella y otros trés acompañaos por Valentín Fuente, gaiteru habitual de concursos de tonada como’l del Conceyu Siero, reflexando la cara más tradicional de la canción asturiana. El resultáu foi’l mesmo que tolos años qu’hubo asturianada nel Semando Fest: enllena l’aforu, emociona, valta prexuicios y amuesa que ye un xéneru musical que pue conquistar espacios nuevos si se dinamiza con otru xeitu.
«Lucía Rojo interpretó trés temes d’asturianada electrónica xunto a Fruela 757, echó tres cantares a capella y otros trés acompañaos por Valentín Fuente. Amosó que la tonada pue enllenar l’aforu, valtar prexuicios y conquistar espacios nuevos si se dinamiza con otru xeitu»
La sala quedara bastante vacía cuando los componentes d’Entós –Celia Nieto (Vigulín), Adrián Argüelles (xiblates) y Javi Menéndez (guitarra acústica y bouzuki)- xubieron a escena a responder les entrugues que Raúl y Yedra d’Héroes Ensin Nome faen a cada artista enantes de la so actuación. Pero foi entamar el conciertu, animar Adrián a que la xente s’averara al escenariu y la cosa volvió a espoxigar; y de qué manera. Hubo baille’l país -qu’algamó la cume nuna danza enorme que s’armó como nunca per tola planta baxa de Lata de Zinc- como respuesta a la música d’esti tríu de virtuosos. El so folk de cámara nun ye nuevo, sigue’l camín sonoru qu’abrieron referentes de la escena como Igor Medio, Lisardo Prieto o Elías Garcia -pa los qu’Entós tuvieron alcordanza-, pero aporta con matices nuevos gracies a la personalidá d’estos trés músicos. Nel conciertu ficieron un repasu del so primer EP qu’asoleyaron n’abril del pasáu añu, amás de tocar versiones -como una tonada de Xuanín de Mieres llevada al folk- y estrenar temes como la ‘Xota Cuero’, la primer composición que fizo Celia Nieto -vigulinera tamién en Corquiéu y Draque, ente otros proyectos-. Na parte final del conciertu tamién hubo ente’l públicu una pareya de baille formada por Iratxe Espina (Algaire, Prau Llerón) y Óscar Vega (Abéu, Trebeyu); un momentu mui prestosu, porque estos dos músicos que tocaron n’anteriores ediciones del Semando Fest amosaron que’l relevu xeneracional tamién lu hai dientro del baille tradicional.
«El folk de cámara d’esti tríu de virtuosos sigue’l camín qu’abrieron referentes de la escena, pero aporta con matices nuevos y punxo al públicu al baillar, amosando que’l relevu xeneracional tamién lu hai dientro del baille tradicional»
«Tamos faciendo llegar esto a xente que nun tien nada que ver cola música asturiana». Más o menos eses fueron les pallabres que dixo Ana Feito -componente de Rellume xunto a Alba Suárez y Alba Estrada-, na entrevista que-y ficieron los presentadores enantes de la so actuación. La xovencísima cantante y panderetera sorrayó asina ún de los puntos fuertes d’esti festival, que pudo palpase viendo la montonera de collacies que tenía esti tríu de música tradicional nes primeres files pa ver el so conciertu. Les trés cabezaleres del grupu nun xubieron soles al escenariu; tuvieron per primer vez acompañaes de Pablo Fernández (Alienda) al baxu eléctricu y a la guitarra acústica y d’Edu Llosa (Alienda, Abéu, BG Villaviciosa…) a les percusiones y a la gaita. Foi un refuerzu instrumental qu’acolumbró’l camín col que’l tríu quier rellumar la escena tradicional, incluyendo sonoridaes novedoses dientro d’ella. Reflexáronlo dende l’entamu, con una introducción al son d’unos armónicos de guitarra a la que siguió un repertoriu de xotes, muñeires, rumbes, pasudobles… too ello engalanao col ritmu y la fuercia de percusiones, guitarra y baxu acompañando con orixinalidá a les panderetes y les voces. Golíase colabo y húbola. Dos díes enantes Abéu estrenaren el single ‘LUMBRÍA – Garrucha’ nel que participen Rellume y, estes dos formaciones nacíes gracies al llabor de les escueles y agrupaciones tradicionales d’El Ventolín (Siero), Fitoria (Uviéu) y Trebeyu (Xixón), interpretaron esti tema xuntes en Lata de Zinc; el mesmu espaciu onde entamó a cocinase esta collaboración nel Semando Fest d’hai un añu.
«Rellume tuvieron acompañaes per primer vez de Pablo Fernández y Edu Llosa, un refuerzu instrumental qu’acolumbró’l camín col que’l tríu quier rellumar la escena tradicional, incluyendo sonoridaes novedoses»
Por supuesto, el públicu nun aparó de baillar, nunes fileres que percorríen la sala d’alantre a atrás y nes que se veía qu’había xente que baillaba asina per vez primera. Va años yera impensable ver a rapaces con estética chandalera/ravera/queer/gen Z baillar tradicional. El sábadu pudimos velo. Gracies Semando Fest, gracies Entós y Rellume, gracies a tola xente que trabaya por caltener y esparder la tradición valtando complexos y prexuicios. El conciertu acabó con Ana Feito, Alba Estrada y Alba Suárez danzando con tol so remangu ente un públicu mui animáu. Taba l’ambiente mui calecíu y paecía que daqué taba a puntu d’españar…
«Va años yera impensable ver a rapaces con estética chandalera/ravera/queer/gen Z baillar tradicional. El sábadu pudimos velo. Gracies Semando Fest, gracies Entós y Rellume, gracies a tola xente que trabaya por caltener y esparder la tradición valtando complexos y prexuicios»
«PVXARRA, PVXARRA, PVXARRA», «Puxa Asturies PVXARRÁ»… yeren dalgunos de los glayíos que se sentíen enantes del primer conciertu que diben dar esti tríu formáu por Cosme (voz y lletres), Argu (baxu) y Ferla Megía (producciones y voces). Pasaben les doce la nueche, el grupu yá agotara toles unidaes de la maqueta Raspiar que diba estrenar en directo y el públicu taba «incontrolable», como reconoció ente rises y plasmu’l co-organizador Raúl Alonso. Afalaben a esti tríu de punk, rap, electrónica… o de lo qu’ellos mesmo definieron asina: «somos PVXARRA y facemos puxarra». Inclasificables, divertíos, enérxicos, únicos na escena asturiana, y necesarios. Tres d’un sampler introductoriu, el pogu españó dende’l primer trallazu y nun abocanó hasta qu’acabó’l conciertu colos trés componentes del grupu esnalando pente’l públicu. Pel mediu, un debut escelente con un show nel qu’hubo partes más poétiques, discursu y reivindicación, autotune y efectos varios y nel que sonó dende’l drum&bass al post-rock, pasando pel rap-metal, l’asturianada (interpretaron ‘Tengo de subir al puertu’ al estilu pvxarreru) y el reguetón. Esti últimu ritmu sintióse dempués de que versionaren ‘Bulls on Parade’ de Rage Against The Machine y samplearen la guitarra de Tom Morello pa tornala nun corte pachangueru col que coreaben “esto lo facemos pa llenar minutos”. Ye un reflexu del humor, la ironía y el bon rollu que tresmite’l tríu y los sos hoolingans; una simbiosis perfecta que zarró’l IV Semando Fest faciendo d’esta otra edición inolvidable.
«Inclasificables, divertíos, enérxicos, únicos na escena asturiana, y necesarios. Con PVXARRA el pogu españó dende’l primer trallazu y nun abocanó nun show que foi una simbiosis perfecta ente’l grupu y los sos hoolingans»
Son les 4.30h la mañana. Llevo dos hores nel sofá, ensin poder dormir, enchotáu por mor de lo qu’acabo de sentir y vivir. Emocionáu por ver el gran relevu qu’hai na música’l país; arguyosu de toles persones y proyectos que caltienen esta llinia trazada dende hai décades; cola ilusión y les fuercies recuperaes; y la cabeza alta, por aquello que decía “onde soi quien quiero ser”. Satisfechu por qu’esta semiente que planté hai trés años col Semando Fest, xorrez llibre. Vémonos l’añu qu’entra.
Semeyes de Lía Lugilde.
Suscríbite a les nuestres novedaes
