El VIII Día de la Reciella yá tien videuclip y suma a les actividaes un conciertu de Llevólu’l Sumiciu y Alicia Álvarez

Esti sábadu 2 d’ochobre de 11h a 19h va cellebrase nel Muséu del Pueblu d’Asturies de Xixón el VIII Día de la Reciella, «una xornada d’ociu, deporte y actividaes pa tola familia que tienen en común l’asturianu como llingua vehicular», como define l’asociación que lu entama, Reciella Families Pol Asturianu. El pasáu 16 de setiembre estrenábamos n’esclusiva en musicasturiana.com “L’asturianu sal con nós“, el cantar col que Xaime Martínez pon-y banda sonora a esti día tan especial y necesariu pa la cultura asturiana. Agora yá ta disponible’l videuclip realizáu por Pablo A. Quiroga Prendes y Juan Tizón y cola collaboración de Pablo Casanueva.

Pero nun ye esta la única novedá rellacionada cola música qu’anuncien dende Reciella. L’asociación incorpora a les actividaes pa esi día una actuación de Llevólu’l Sumiciu na que’l dúu de música electrónica asturiana va ufrir una sesión a les 14h pa zarrar la programación de la mañana, y otra d’Alicia Álvarez a les 18h, que va presentar el so nuevu trabayu de cantares pa la reciella ‘Kikirikikí‘. Con estos dos fechos, Reciella afonda nel papel normalizador que tien la música pa les nueves xeneraciones d’asturfalantes, como amuesa los cantares que cada añu ponen banda sonora al Día de La Reciella y nos que yá participaron Skama la Rede con “Entaína“, David Varela con “N’asturianu, sumes“, Pop Piquiñín con “Espoxiga“, Alicia Álvarez con “Préstame pola vida“; y esti 2021 l’encargáu de facer el cantar son Xaime Martínez y La Familia Tradicional con “L’asturianu sal con nós“.

Mira’l videuclip de “L’asturianu sal con nós”

Mercar na tienda online discos pa la reciella