Ayeri entamó en Bilbao una edición nueva de BIME, l’alcuentru más importante de la industria musical que se celebra nel Estáu español. Nesta edición Asturies tien por vez primera presencia oficial institucional gracies a la collaboración que fai la Conseyería de Cultura, Política Llingüística y Deporte con esti eventu. D’esta manera ye como güei a les 16.45h va desenvolvese la cita «un culín de música», na que va facese una presentación del sector profesional asturianu, amás d’una degustación gastronómica de productos de la tierra y de sidra d’Asturies.
BIME ye un alcuentru internacional de la Industria Musical que se fai dende 2013 en Bilbao y, dende 2022, tamién en Botogá (Colombia). Ye ún de los congresos musicales más importantes de la industria musical del Estáu español, con miles d’asistentes de tol mundu y nel qu’hai ponencies, formación, conciertos, esposiciones profesionales, alcuerdos de negociu, etc. MUSICASTURIANA.COM participó como asistente ente 2022 y 2025 col oxetivu de medrar en conocimientos; de visibilizar la música del país; de crear oportunidaes de negociu con otros axentes culturales; y de conocer les polítiques musicales que tán desendolcando distintes alministraciones públiques.
Nesti 2026 la Conseyería de Cultura, Política Llingüística y Deporte abrió por vez primera una convocatoria dirixida a artistes d’Asturies pa participar nel BIME 2026. Tres de recibir más de 50 propuestes, la organización del eventu escoyó a Axolotes Mexicanos pa ufrir una actuación curtia (showcase) énte profesionales de la industria musical, dientro de la programación de BIME Live. D’esta forma, van poder amosar el so trabayu a programadores, promotores, públicu y otros axentes del sector. Amás dende la Conseyería ufrióse a axentes asturianos del sector un 50% de descuentu pa la entrada al eventu y güei fáise l’alcuentru «un culín de música» pa dar a conocer la vitalidá del sector asturianu ente persones y organizaciones de la industria musical de tol mundu.
Suscríbite a les nuestres novedaes
