Les escueles de música tradicional y distintes agrupaciones de música de raigañu siguen entamando les sos actividaes navidiegues. Esti fin de selmana hai tres cites: el vienres 19 ye’l conciertu solidariu Villa de Xixón y el conciertu de Navidá d’A Mansalva en Llangréu; mientres que’l domingu 21 ye’l festival de Navidá de la Escuela de Música Tradicional d’El Gumial.
La Plaza’l Parchís de Xixón acueye’l vienres a les 19.30h un conciertu solidariu nel qu’actúen la Escuela de Música y Baille Tradicional Villa de Xixón, Gijón Jazz Band, Banda Gaites Infantil Magüeta, Banda Gaites Villa de Jovellanos y Banda Gaites Villa de Xixón. Lo recaudao va dir en sofitu del Bancu d’Alimentos d’Asturies.
Esi mesmu día a les 20h nel Teatru José Delestal de La Felguera A Mansalva entama’l conciertu de Navidá. Nél los escolinos y escolines de toles disciplines d’esta escuela de música van subir al escenariu p’amosar no que vienen trabayando a lo llargo del añu: gaites, pianu, guitarres, percusión, voz, batería, panderetes…
Por último, el domingu 21 d’avientu a les doce’l mediudía la Escuela de Música Tradicional El Gumial, venceyada a la banda gaites del mesmu nome, celebra’l so festival de Navidá nel Teatru Cine Carmen de Morea.
Semeya esbillada del facebook del Conceyu de la Gaita, d’una actividá de les Xornaes de Música Tradicional.
Suscríbite a les nuestres novedaes
