Yá ta a la venta y en toles plataformes musicales el primer trabayu de la Banda Gaites El Gumial, Aire na rampla. La formación ayerana publica diez temes colos que percuerren pieces tradicionales asturianes, ayeranes y otres de composición propia; too ello con una montonera de collaboraciones de cantantes y instrumentistes del país. La formación va presentalu en directo esta nueche col conciertu que van dar a les 23h dientro del FolkAyer.
«Tuvieron que pasar más de 25 años pa qu’una banda gaites ayerana asoleye un discu, dempués del De La Pandiel.lina a Galway de la B.G. La Viga Travesá», cunta’l veteranu gaiteru d’Ayer Santi Caleya nel prólogu del llibretu del álbum; un testu nel que reconoz el bon trabayu d’El Gumial nesti álbum y nel so llabor. La formación ayerana dirixida por Diego Lobo tamién destaca que l’álbum «ye’l resultáu d’un suañu compartíu. D’años de trabayu, amistá, aprendizaxe y pasión pola música tradicional asturiana. Detrás de cada nota hai hores d’ensayu, quilómetros percorríos, escenarios vivíos y alcordances que güei tomen forma n’Aire na rampla. Un soníu que permanez«.
Asina ye como a lo llargo de nueve temes -más un remix a mou de bonus track– El Gumial percuerren cantares populares como ‘Tengo de subir al Puertu’, ‘L’Amudar’, ‘Con qué l.lavas la cara’, o’l ‘Santa Bárbara Bendita’. Nun podíen faltar pieces instrumentales: marches, muñeires, saltones, llixeros… amás de temes de composición actual; propia y ayena. ‘Bz’ fírmalu’l gaiteru bercianu José Manuel Pérez Castro, director de la Banda Gaites Castro Bérgidum; ‘Flores de 50 libres’ tien una parte compuesta por Diego Lobo -amás d’otra na que versionen un tema de Spanta la Xente-; ‘Felpeyu‘ ye un homenaxe a temes d’esta mítica formación folk y ‘Gumial’ ye una composición que’l grupu Cuévano dedicó a la banda gaites. Tamién graben el solu de percusión col que la formación compitió y fizo pódium en dellos concursos d’esti calter.
La Banda Gaites El Gumial fórmenla una cuarentena de componentes y pa esti discu arrodiáronse tovía de más xente. Los grupos NosOtrestres, Algaire y Cuévano ponen voz, pandereta, coros y otros instrumentos en trés temes; Carlos Velasco canta en solitario n’otros cantares; Celia Nieto (Corquiéu, Entós, La ciudá nel mar) toca’l vigulín nuna pieza. Amás, hai dellos músicos qu’andechen en varios temes: Dani Álvarez (flauta de madera, tecláu, baxu, programaciones y bodhran); Julio Rodríguez (bouzouki); Emilio Amboage (guitarra acústica); y Dani Valdés (batería y percusiones). Tamién Dani Álvarez s’encargó de la producción musical xunto a El Gumial y Dani Valdés de la grabación, mezcla y masterización nos Estudios Martian de Tisoriu (Villaviciosa). Completen los créitos d’esta obra colectiva el diseñador Antón Barquero y la fotógrafa Leticia Cienfuegos.
«Queremos crear un trabayu que recueya tolo deprendío, vivío y compartío estos años. Un discu que represente la nuestra evolución musical y que quede siempre como memoria d’esti camín que llevamos andao. Porque un primer discu nun ye namás una grabación: ye identidá, ye memoria y una forma d’amosar al mundu quién somos y qué sentimos a traviés de la nuestra música», decía El Gumial cuando anunció’l proyectu. Con Aire na rampla algámenlu y esta nueche van facer una amuesa de too ello nel conciertu que van dar dientro del FolkAyer.
Suscríbite a les nuestres novedaes
