La gaita sigue protagonizando más noticies tres de la cita d’ayeri domingu entamada pol Conceyu de la Gaita pa festexar el día internacional del instrumentu y la declaración de la conseyera de Cultura, Política Llingüística y Deporte, Vanessa Gutiérrez, de que’l gobiernu asturianu va entamar los trámites pa declarar Bien d’Interés Cultural (BIC) a la cultura de la gaita. Agora llega’l turnu del los conservatorios d’Asturies qu’organicen varies actividaes pedagóxiques al rodiu l’instrumentu ente güei martes 11 y el miércoles 26 de marzu.
L’Aula de Gaita del Conservatoriu Superior «Eduardo Martínez Torner» (CONSMUPA) va treslladase’l martes 11 de marzu al IES Aramo d’Uviéu pa interpretar, a les 10.35 hores, el conciertu didácticu Gaiteres: un percorríu pela presencia de la muyer nel mundu de la gaita. La siguiente selmana, el sábadu 22, l’edificiu del CONSMUPA va acoyer la I Xornada Les Enseñances de la Gaita n’Asturies. Los estudios reglaos de gaita asturiana, con una programación bien bayurosa que va durar tola mañana.
Pa zarrar el mes, el pernomáu gaiteru José Ángel Hevia va alcontrase col alumnáu del CONSMUPA y los Conservatorios Profesionales d’Uviéu y Xixón el miércoles 26 a les 17.45h., dientro de les Xornaes Culturales del Conservatoriu Profesional «Anselmo González del Valle» (Uviéu).
*Na semeya de la noticia, Justina Castañón, una de les muyeres gaiteres pioneres.
Suscríbite a les nuestres novedaes
