La cultura asturiana de la gaita va ser BIC

La Conseyera de Cultura, Política Llingüística y Deporte, Vanessa Gutiérrez, dio anuncia, nel contestu de los actos entamaos pol Conceyu de la Gaita pol día internacional del instrumentu, de que’l Gobiernu va entamar los trámites pa declarar Bien d’Interés Cultural la cultura asturiana de gaita. L’envís d’esti procesu ye’l de caltener el patrimoniu inmaterial, como yá se ficiere con otres espresiones como la cultura de la sidra -declarada, tamién, patrimoniu mundial pola UNESCO-, la Misa de gaita, l’Asturianada, los traxes llaniscos d’aldeana y porruanu, los sidros y les comedies de Valdesoto, los bolos asturianos, la cultura del acebache y el Corri-corri d’Arenas de Cabrales.

Na so intervención nel Día Internacional de la Gaita, que Vanessa Gutiérrez aprovechó pa compartir les intenciones del Gobiernu, la Conseyera dedicó unes pallabres d’agradecimientu pa les gaiteres que, como Kety García -a la qu’homenaxearon nel actu- exercen de referentes y a «les bandes, asociaciones y escueles de música tradicional, que vienen salvaguardando la nuestra cultura, dándola a conocer ente les xeneraciones más moces, al tiempu que faen de ponte y reconocen a los y les gaiteres más veteranos que ficieron posible que la nuestra cultura llegare con esta vitalidá hasta güei».

La emigración asturiana tamién tuvo presente nel so discursu, nel qu’afondó na importancia del llabor de los Centros Asturianos y otros colectivos na diáspora pal espardimientu de la cultura musical del país más alló de len llendes del territoriu y, concretamente, de la gaita. En pallabres del Gobiernu, «la declaración de la cultura asturiana de la gaita como BIC va permitir reforciar el so estudiu, espardimientu y caltenimientu, asegurando qu’esti heriedu siga vivu pa les xeneraciones futures y consolidando la so importancia na historia y identidá de la comunidá». Los actores sociales implicaos na cultura de la gaita n’Asturies celebren l’anuncia del Gobiernu y el so enfotu pa col caltenimientu del patrimoniu, y esperen qu’estes declaraciones y reconocimientos institucionales puean materializase en sofitu y medios pa desendolcar la so actividá.