Esti sábadu en L’Infiestu vuelve la Nueche en Danza
El sábadu 12 de marzu, a les 22:30 hores, na Plaza Xosefa Canellada de L’Infiestu va entamase una edición nueva de la xuntanza conocida como ‘Nueche en Danza‘, con ella esti eventu llega yá a la númberu ventidós. Esta Nueche en Danza en Piloña va tener un aquel especial tanto poles ganes de volver a la presencialidá y disfrutar en vivo del baille y la música del país, como poles demás actividaes que programaron los organizadores del eventu: La Benéfica de Piloña, LaKadarma, Les Ablanes, l’Asociación Vecinal Ríu Fontoria d’Areñes y l’AMC Bocanegra; too ello, col sofitu del Ayuntamientu de Piloña y la collaboración del colectivu de les nueches en danza.
A les 18:00h los Sidros de Valdesoto van facer un pasucáis peles cais de L’Infiestu y a les 20:00 h va desenvolvese un taller de baille coordináu pol etnomusicólogu llaniscu Santi Galguera, quien tien investigao sobre’l baille tradicional nel oriente del país, especialmente sobre la xota y lo llixero, amás de pertenecer a delles asociaciones de música y baille tradicionales. Llueu a les 22:30h arranca la Nueche en Danza na Plaza Xosefa Canellada na qu’amás la organización convida a la xente a dir antroxao. Va haber serviciu de barra con comida y bebida tola nueche un serviciu de bus especial dende Uviéu con salida a les 21.00h de Santuyanu (centru comercial) y cola vuelta dende L’Infiestu a les 03.00. P’acutar la plaza ye necesario llamar al 696.180.292.
XII Nueche en Danza
Foi en marzu del añu 2015 cuando s’organizaba per primer vez esta, según los sos responsables, «xuntanza de xente pa baillar, tocar y cantar ensin más pretensión que la de pasalo bien». L’éxitu de la convocatoria fixo que la idea cuayare y la ‘Nueche en Danza’ fuere afitándose hasta llegar a estes más de venti ediciones con cientos de danzantes revitalizando y dando puxu a la musica y el baille tradicional asturianos. Mesmamente, en metanes del andanciu del coronavirus, na edición ventiuna, cola población enzarrada en casa y ensin nenguna posibilidá d’axuntase, llegó a celebrase. Nesa ocasión consistió n’asoleyar peles redes sociales decenes de vídeos de xente baillando nes sos cases.
