Yá se conocen los seis finalistes del I Premiu Obdulia Álvarez La Busdonga d’Asturianada, que van competir pol algamalu esti vienres 29 de payares a les 19h nel Teatru La Llaboral de Xixón. Lorena Corripio López, Alicia Villanueva Megido, Sergio Menéndez Fernández, Carlos Velasco Montes, Néstor Díaz González y Marina Carbajosa González. son los seis intérpretes escoyíos nes semifinales de Cangas del Narcea, La Pola Siero y La Felguera. La Conseyería de Cultura, Política Llingüística y Deporte convoca esta reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial en 2015. Na gala del vienres, amás, van actuar Mariluz Cristóbal Caunedo y Jorge Tuya. La entrada ye llibre y gratuita, anque ye necesario reservar invitación nel enllaz a la web de reserves.
Lorena Corripio López (categoría absoluta femenina) llega de Carrandi (Colunga) con una trayectoria llarga y enllena de reconocimientos. Siempre sintió cantar porque so güelu Eduardo cantaba asturianada y xunto a él percorrió munchos concursos, siguiendo a los grandes cantadores del momentu. Quixo’l destín que nuna edición del campeonatu de Xixón la so vida se cruciare cola d’Ismael Tomás. Xunto a él dio los primeros pasos y deprendió a desenvolvese nos escenarios. D’entós p’acá foi llabrando un palmarés nel que tien más de 40 primeros premios nos concursos principales del país.
Alicia Villanueva Megido (categoría absoluta femenina) ye’l meyor exemplu de cómo la constancia y el trabayu siguíu fai al artista recoyer frutu. Dende los 5 años entra en contactu col folclore na Asociación Cultural Los Yerbatos de Bimenes, na qu’empieza baillando y na que, a los 8 años, arranca la formación como intérprete de canción asturiana siguiendo les directrices d’Anabel Santiago. Al pocu tiempu, entra en contactu colos concursos d’asturianada y empieza a destacar nes muestres y nes categoríes moces. Dende qu’arrancó, enxamás abandonó la competición nin la formación, que considera imprescindible.
Sergio Menéndez Fernández (categoría absoluta masculina) heredó l’afición pola música asturiana de so güelu maternu, «Gonzalo Mieres», impulsor de la cultura, el deporte y la música asturiana sobre manera en Xixón, anque na so familia tamién hubo grandes voces como les de la bisgüela Consuelo o la de so güela M.ª del Pilar. Empezó na tonada como gaiteru, acompañando a cantadores nos chigres del barriu d’El Llano y adulces foi apeteciéndo-y entonar asturianaes. Púnxose en contactu con Ismael Tomás y foi formándose hasta llegar a poder competir nos principales concursos.
La trayectoria de Carlos Velasco Montes (categoría absoluta masculina), natural de Bimenes, empieza’l día que xube la primer vez al escenariu nun homenaxe que-y fixeren a so pá Daniel Velasco, cantador d’asturianada reconocíu. Naide en so casa sabía entós de les bones cualidaes pa la canción asturiana d’esti yerbatu, que dexó al públicu ablucao y a so pá enllenu d’emoción. Empieza compitiendo n’aficionaos nel añu 2009 y dende entós foi construyendo un palmarés con premios importantes.
Néstor Díaz González (categoría moza) ye un llaniscu de 14 años que lleva la metá de la so vida averáu a la canción asturiana. Na so familia enxamás hubo afición, pero un primer contactu na escuela, preparando la visita de la TPA pal programa Fálame, fixo que l’asturianada calare pa siempre nél y que s’animare a recibir enseñances de técnica vocal y de repertoriu de la mano d’Anabel Santiago. Ye ella la que-y da la oportunidá de debutar nun escenariu a les dos selmanes de la so primer clas. Anabel ye’l so gran referente xunto a Sergio Agüeros.
A Marina Carbajosa González (categoría moza) nun había cosa que más-y prestare con 5 o 6 añinos que sentir a so güelu José Ramón cantar asturianada y ver con él los programes del xéneru na TPA. Asina foi faciéndose grande l’afición d’esta moscona de 16 años qu’a los 9 díxo-y a so madre que quería cantar como les sos cantadores de referencia: La Busdonga, M.ª Luz Cristóbal o Anabel Santiago. Con esta última empezó la so formación na Escuela de Música d’Uviéu, que depués siguió con Celestino Rozada y anguaño con Ismael Tomás. Debuta nel Auditoriu Teodoro Cuesta de Mieres nun festival de voces moces y dende’l 2021 empieza a sobresalir na so categoría.
El premiu
La gala final d’esti certame va repartir 15.000 euros en tres categoríes: 6.000 euros pa la categoría femenina, 6.000 euros pa la masculina y 3.000 euros pa la de mocedá (menores de 22 años). Con esti premiu nuevu, la Conseyería busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta los criterios que s’especifiquen nes bases que se publicaron nel BOPA. Estos son la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística.
Suscríbite a les nuestres novedaes
