Esti vienres 24, a les 17h nos cines Yelmo de La Calzada ye la última oportunidá pa ver dientro del FICX (Festival Internacional de Cine de Xixón) la película Muyeres. Escrita y dirixida por Marta Lallana (Zaragoza, 1994) y protagonizada pol prestixosu productor Raül Refree (Barcelona, 1976), ta grabada nos montes de Somiedu y retrata a les últimes guardianes de la tradición oral milenaria d’Asturies. La película ye’l resultáu d’un procesu qu’entamó’l 18 d’abril de 2019 -como cunta Ramsés Ilesies, una de les figures de la música asturiana qu’apoyó esti proyectu xunto a Xosé Antón Ambás y Rodrigo Cuevas, ente otros- y que tuvo’l so estrenu mundial en xunu nel Festival de Shanghài, onde algamó’l Premiu del Xuráu y Premiu a la Meyor Fotografía.
«Pelos montes asturianos de Somiedu ta un llugar onde’l tiempu para. Ente lo real y lo fantástico habiten muyeres que caltienen vieyos cantares, monstruos amazcaraos que baillen so la lluna y numberoses lleendes que se cunten alredor de la llume. Un conocíu músicu (Raül Refree) decide dexalo too y viaxar hasta ellí pa rexistrar tou esti llegáu enantes que desapaeza», con esta sipnosis preséntase esta película que respuende al interés de Marta Lallana y el mentáu Refree pola música popular asturiana: «la desaparición d’estes muyeres nun significa namás la perda de los sos cantares, sinón tamién tola so tradición y, por eso mesmo, la so identidá», sentencia la sipnosis.
D’esta manera, el foriatu Raül Refree entra nestos pueblos y esplora la cultura popular a traviés de la cinta. Ye un reflexu de lo que vivieron Lallana y el propiu Refree a lo llargo del so contactu con Asturies; un vínculu qu’entamó asina: «Ambás lleva a Rodrigo Cuevas y al so productor musical d’entós, Raül Refree -con él firmaría Manual de Cortejo–, a visitar a Gelita d’El Cabanón (Ayer), cantante d’asturianada yá finada a la que conocienon gracies al programa de la TPA Camín, nun viax nel que queríen ensiña-y la vitalidá y dellos exemplos de la nuesa cultura inmaterial. Frutu d’esa presentación fairíense munches collaboraciones ente Rodrigo y Gelita, maravilla pura. Esta visita tamién va ser importante pa Marta Lallana». Les pallabres son de Ramsés Ilesies, qu’a traviés del so Instagram, relata parte de la intrahistoria d’esta cinta.
«Nun ye hasta l’añu siguiente, cuando Marta se pon en comunicación col ATOAM pa falanos d’un proyeutu cinematográficu personal inspiráu nel nuesu trabayu de campu. Marta, empapóse de tolos episodios de la serie Camín y Camín de Cantares colgaos nel portal “TPA a la carta”, taba namorada na tradición oral asturiana y quería presentanos la idea. Evidentemente, tardamos cero coma en querer cha-y un gabitu». «Quedamos el día 16-12-2020 en Doriga (Salas) pa conocenos y chamos el día per La Bustariega y El Vaḷḷe (Somiedu)», sigue relatando Ilesias sobre esti procesu marcáu por «la fraxilidá que tien el mundu de la tradición oral; les referentes van faltando o pónense males y yá nun tán en condiciones de subise a un barcu d’esti tipu, asina que rápidamente entamamos a buscar xente que-y presentar porque delles de les muyeres que tenía Marta en mente yá nun podíen».
Dellos premios
El resultáu de too esto pue vese nos 70 minutos que dura Muyeres. La película estrenóse n’Asturies dientro del FICX el pasáu sábadu 18, proyectóse nel Centru Niemeyer el llunes 20 y esti vienres 24 tien el últimu pase nesti festival. Sicasí, yá lleva tiempu rodando y algamando reconocimientos: ta nominada a la 38 edición de los Goya y, dempués del estrenu nel Festival de Shanghài onde algamó los mentaos premios, foi escoyida notros festivales como’l SEMINCI en Valladolid -Premiu Espiga Verde y Premiu del Públicu a Meyor Película, la Mostra Säo Paulo International Film en Brasil, el FIDBA (Festival Internacional de Cine Documental de Buenos Aires) y el Festival Cinespaña en Toulouse, onde algamó gallardón a la Meyor Música pa Raül Refree y una mención especial pa la directora. Too esto ye un reflexu del potencial que tien la cultura asturiana pa qu’espoxigue un cine con identidá asturiana que visibilice dientro y fuera d’Asturies los raigaños d’esti país.
Amás de Muyeres, Marta Lallana tamién ye la realizadora del videoclip de «Rambalín» de Rodrigo Cuevas. Nacida en Zaragoza en 1994, graduóse na Escuela d’Arte de la so ciudá y estudió cine na Universitat Pompeu Fabra. Ye directora d’Ojos Negros (2016-2019) -onde tamién collabora con Raül Refree- y Terenci: La fabulación infinita (2023). Sobre Muyeres comenta lo que vien darréu: «Ye un cantu a la belleza de la urxencia, dándo-y valir a toes eses muyeres que tienen ayalgues del nuestru pasáu, filmando la so identidá y tradición musical, con una banda sonora contemporánea dirmada por Raül Refree. Asina, de dalguna manera, asegurámonos que la tresmisión siga. Porque si son poques coses les que nos pueden salvar de la pérdida de memoria colectiva, una d’elles ye, ensin dulda, el simple actu de facer cine».
Suscríbite a les nuestres novedaes
