Revista ‘Alcordances’ (1994), del Conceyu de Gaiteros Asturianos

En 1990 creóse’l Conceyu de Gaiteros Asturianos, la primer asociación qu’axunto a los y les intérpretes d’esti instrumentu nel contestu del boom de la gaita. Ente los oxetivos de la entidá taba asoleyar una revista. En 1994 voi la lluz el primer y únicu númberu d’Alcordances, qu’agora dixitalizamos dende l’Archivu de la Música Contemporánea Asturiana (AMCA)

A principiu de los años 90 del sieglu XX, produzse’l llamáu boom de la gaita n’Asturies; nesi momentu los alumnos y alumnes de les escueles que se creen por iniciativa privada o asociativa cuéntense por cientos, per otru llau escomiencen a apaecer tamién les escueles públiques de música tradicional, les bandes de gaites espárdense pela xeografía del país y dellos maestros gaiteros profesionalícense. Nesti contestu surde la primer asociación qu’axunta a los y les intérpretes del instrumentu, ello ye que nel añu 1990 créase’l Conceyu de Gaiteros Asturianos (CGA), de la que faen parte los miembros más destacaos de la primer xeneración que foron protagonistes d’esi boom.

Los primeros responsables d’esti colectivu foron: Pedro Pangua (Presidente), Pelayo F. Coalla (Secretariu) y José Manuel Gutiérrez ‘Guti’ (Tesoreru). Ente les actividaes y xeres qu’entamen destaquen unos Alcuentros añales –Proaza 1990 y 1991, Grau 1992–, o la creación d’un grupu de trabayu qu’introduz cambios técnicos na dixitación, codifica’l repertoriu y normaliza un métodu de deprendimientu qu’unifica los criterios d’enseñanza. Conviértese nel interllocutor cola Alministración autonómica, aceptando ésta organizar un cursu pa maestros gaiteros col envís d’introducir la enseñanza de gaita nel grau mediu de los conservatorios profesionales. Esti foi’l motivu principal pol que, en 1994, diba producise’l desalcuentru ente aquella primer xeneración de gaiteros y la segunda que, nun tando conformes col procesu que se ta siguiendo pa entamar el cursu, dexen el Conceyu y creen una nueva asociación, la Federación Internacional de Gaiteros Asturianos (FIGA), qu’ente otres actividaes llega a entamar un Campeonatu de Bandes de Gaites. Nenguna de les dos asociaciones llegaría a caltenese más allá d’unos años.

Ente los oxetivos que tenía’l Conceyu de Gaiteros Asturianos taba la publicación d’una revista, de la que queríen asoleyar al añu tres númberos. Na primavera de 1994 saldría’l primeru d’ellos col nome d’Alcordances, con 32 páxines, en blancu y negru y un conteníu variáu alredor del mundu de la gaita n’Asturies. Pente les temátiques incluyíes rescamplen una biografía de Remis Ovalle, un artículu sobre la rellación ente la gaita y los páxaros o una collaboración de quien fuere’l creador del Muséu Internacional de la Gaita (Xixón), Luis Argüelles, titulada «1.889 Añu del primer trunfu de la gaita». Finalmente, el CGA namás llogró publicar esti númberu de la revista, quedando como un exemplu solitariu de les sos intenciones. Agora, l’Archivu de la Música Contemponánea Asturiana (AMCA) ponlu a disposición de toles persones interesaes nel nuestru instrumentu nacional.

// Calca equí pa lleer na Hemeroteca la revista alcordances //

Dexa un comentariu

X