El 8 de marzu, Día Internacional de la Muyer, ye una fecha pa reivindicar derechos, pa movilizase na cai, pa lluchar pola igualdá de xéneru y de clase… y tamién pa sentir música. Dende Musicasturiana.com sumámonos a les distintes actividaes simbóliques que se faen concidiendo col 8M y por eso llanzamos en toles plataformes dixitales Al son de les muyeres, un discu que compila 22 cantares interpretaos por proyectos musicales protagonizaos por muyeres asturianes y que la so música ta alministrada dientro del nuestru catálogu de distribución dixital.
Darréu facemos un repasu de quién son estes artistes y convidámosvos a poner al altu la lleva los sos cantares non namás güei, sinón tolos díes, porque entá queda muncho qu’avanzar pa valtar la brecha de xéneru tanto na industria musical como en toles estayes de la sociedá. D’esta manera defendemos el feminismu tanto na música -de fechu, dalgunos de los cantares escoyíos tienen una marcada temática feminista– como na sociedá.
Nel contestu de los preparativos pa la manifestación pol 8M en Mieres en 2023, el colectivu feminista de la Cuenca Minera Brigada Feminista, que participa na plataforma Asturies Feminista 8M, amestó una lletra sobre la sororidá ente muyeres a la melodía de la Xota Val.lebreu. El resultáu ye esti himnu del movimientu feminista asturianu qu’abre’l compilatoriu: ‘Compañera, dame tira’.
Laura Marcos escribe la lletra d’esti cantar feminista qu’asoleyó Algaire nel so primer discu Coral y Maera y pal que publicaron, amás, un videoclip la viéspora del 8 de marzu de 2022. La fuercia de Loreto Suárez, Carla Miranda y Iratxe Espina améstase a la danza que formen les muyeres cuando suena esti cantar nos sos conciertos, un glayíu que reivindica’l valir del llabor de cuidaos col qu’históricamente -entá anguaño- carguen les muyeres.
Dempués de la Pandereta Revolution qu’entamaron en 2007 con ¡Sali, l.luna!, tresformando la figura de la panderetera na música asturiana, Herbamora tornaron a l’orixe en 2013 col EP N’Acústicu, un trabayu nel que les sos voces son protagonistes. Na cuarta pista suena ‘Compañeras’.
‘Pinky’ ye ún de los temes más populares de la nueva era del colectivu Muyeres que, anque dedicaron les más de les sos tres décades d’historia a la investigación etnográfica y la música tradicional, asoleyaron en 2020 un discu de composición propia en forma d’homenaxe a les Humanes, les muyeres anónimes y imperfectes que caleyaron enantes que nós.
L’Entamu foi’l primer discu del proyectu de folk Eva Tejedor & Les Pandereteres (2019), anque’l so camín entamara muncho enantes nes aules y escenarios d’Asturies. ‘Tangoreteres’ suena nél a ritmu de tangu, como’l so nome adelanta, con música tradicional y lletra de Marian Moreno Llaneza y Eva Tejedor, na qu’agradecen, na mesma llinia de Muyeres, la llucha y les enseñances de les muyeres d’antaño.
Coincidiendo col Día de les Muyeres de 2019, Silvia Quesada asoleyaba ‘La Mesma Revolución’ como adelantu del so discu Prefiero ver llover, con lletra d’Alfredo González y la so característica sonoridá pop. El tema, que ye un cantu a que les muyeres se fagan dueñes del so destín, publicábase acompañáu d’un videoclip.
Ente los munchos proyectos conxuntos que tienen les hermanes Gema Fernández y Sil Fernández alcuéntrase Delagua. Con esti proyectu de música fusión canten en castellanu, sacantes cuando participaron nel compilatoriu Engarradiella. Pa la ocasión grabaron ‘L’Arbeyal’, una versión n’asturianu d’un cantar de temática LGTBIQ+.
N’acabando la manifestación feminista del 2022 en Xixón, Alba Menéndez, Natalia Vega y Elisabeth Montequin, emocionaes, encaramáronse a la Plaza de L’Humedal de Xixón, invitaes pola plataforma Asturies Feminista 8M, pa poner el ramu a una de les marches más multitudinaries que se recuerden n’Asturies. Ellí cantaron y tocaron nuna mesa la panadera ‘Rompiendo muries’, arguyoses de ser muyeres, que dempués grabaríen nel so primer discu Sutripar.
La gran cantadora d’asturianada abrió un camín nuevu pal xéneru col so discu del 2001 Onde la ñublina posa. Esa mesma melodía qu’abre l’álbum ye una declaración d’intenciones pa los que, como ella mesma cuntó, queríen censurala por cantar eses tonaes que tradicionalmente s’asociaben a los paisanos. El so atrevimientu d’entós ye’l presente de la canción asturiana.
Leticia Baselgas, la metá de L-R compunxo la Xota Cangas ‘Veis Volver’, una mirada post-folk -esa revisión de la música tradicional amestada a sonoridaes contemporánees y novedoses- a la señaldá y les memories cuando neña, pal so segundu discu xunto a Rubén Bada, N.O.S.
La voz de Mapi Quintana trespasa la so reinterpretación en clave jazz de l’asturianada ‘A vivir a la montaña’, una de les melodíes que forma parte del que probablemente foi’l so trabayu más ambiciosu, Música pa tornar páxaros, estrenáu nel branu de 2022 nel añu d’Asturies del Festival Interceltique de Lorient y que dempués tornó en discu en 2023 acompañada de dellos de los meyores músicos del país d’estilos estremaos.
La cantante y escritora Ángela Gómez de Ávila y la multiinstrumentista Ana Pereda formaron en 2011 Filanda, un proyectu qu’entemez canción d’autor, pop-rock y folk. En 2015 llanzaron el so únicu discu, Despeinando’l Silenciu, nel que s’alcuentra’l cantar ‘Enraigonaes’; una reivindicación de la tierra y la llucha.
Esta multiinstrumentista canguesa, dempués d’un percorríu bultable nel ámbitu del jazz y la clásica, dio’l saltu a la escena de la música asturiana en 2023 algamando’l XV Premiu Camaretá con ‘Dixo miou padre’. La so autoría y sensibilidá va poder sentise nun álbum compuesu, interpretáu y producíu por ella mesma -cola collaboración de dellos artistes- próximamente.
Ana Pereda llidera la formación asitiada en Francia laGuinda. Les sos composiciones d’atmósfera folixera, dacuando inspírense nel folclor asturianu. Ye’l casu d’esti ‘Pandeiru’, el so últimu single, un tema que reinterpreta una vaqueirada del repertoriu tradicional recopiláu por Eduardo Martínez Torner.
La primer edición del Semando Fest finó nel recopilatoriu Semando Son y, con too ello, esta versión de la mítica asturianada ‘Al pasar por el puertu’ que Luis Álvarez Pola al pianu y la cantadora Alicia Villanueva interpreten al estilu de les grabaciones d’entamos del sieglu XX col so xeitu personal.
Anque les composiciones d’anguaño de Marisa Valle Roso puen encuadrase nun estilu pop de canción d’autora, los sos entamos son inseparables de la tonada. La so característica manera de matizar y dar el gustu a les asturianaes suena nesti compilatoriu acompañada por Xaime Arias al pianu en ‘La Soberana’, «nacida en monte y criada ente la rama».
Ún de los discos que revisitaron l’asturianada y los cantares tradicionales dende otres sonoridaes y con muncha electrónica na última década ye Y_Andá (2018) d’Anabel Santiago. Esti trabayu de testures pue sentise en ‘De Lavar del Río’, la so versión del hit de les nuechen en danza L’Amudar.
Col mesmu envís pero algamando una atmófera radicalmente estremada a la d’Anabel Santiago suena la vaqueirada ‘La somedana’ na voz de Belén Antón. Esti cantar del so segundu discu, Los díes contaos, sustitúi l’acompañamientu tradicional de percusión por una guitarra rítmica y envolvente al empar.
La cantante y panderetera afincada en Bretaña, Clara Amieva, creó en 2020 esti tríu que reellabora la música tradicional asturiana dende una óptica contemporánea y con sonoridaes nueves. Chants de Femmes des Asturies ye l’únicu álbum que llanzaron hasta la fecha y n’él suena esta ‘Muñeira Trabáu’.
Amás de cantar grupu folk Llangres, Esther Fonseca entamó en 2002 una carrera en solitario averada a la canción d’autor. Anque la música ta compuesta principalmente pol so pá, Nacho Fonseca -creador de Xentiquina-, ella ye la que pon voz y personalidá a esti proyectu como amuesa ‘Negra‘, un cantar del discu Viaxe dedicáu a les migrantes.
«Hai yá más de cien años que l.luitamos pola igualdá, l.levamos muito cal.ladas, pero agora vais escuitar». Asina entama, colos panderos, el ‘Cantu a les muyeres’ de Calea nel que les voces de Leti Baselgas y Silvia Quesada intercálense col vigulín de Rubén Bada. Una lletra pa toles muyeres trabayadores a les que nun-yos quedó otra -nin-yos queda- que ser «supermuyeres» pa sobrevivir nesti munchu fechu por y pa los paisanos, sofriendo la medrana, les breches y la desigualdá.
El son de les muyeres asturianes tamién ye punk. Ochobre, cola gaita de Natalia González y la voz de Reichel Machinee son un exemplu d’ello. El cantar que zarra esti compilatoriu ye un berríu de llucha por toles voces que la historia asesinó y silenció, pola soberanía y autodefensa de les muyeres.
Suscríbite a les nuestres novedaes
