Esti fin de selmana va haber cinco cites cola música’l país ente les qu’hai premios, charres y conferencies, estrenos y zarros d’espectáculos. L’axenda entama’l vienres a les 10h nel Teatru Filarmónica d’Uviéu cola gala de los Premios AMAS, nos que tán nominaos 26 artistes venceyaos a la música n’asturianu. Al otru día, Vérsica van dar el so primer conciertu nel CPI de Llugones -a les 20h y con entrada llibre-, axuntando música, lliteratura y artes plástiques.
El domingu 9 ye’l Día Internacional de la Gaita y el Conceyu la Gaita entama una montonera d’actividaes pa festexalo en Xixón. En Mieres, nel Auditoriu Teodoro Cuesta a les 12.30h, la Federación Coral Asturiana (FECORA) entama los Premios Axuntábense 2024 colos que gallardona a José Manuel San Emeterio Álvarez, el proyectu Antología coral asturiana -David Pérez Fernández y Guillermo Martínez Vega- y al Coru Mineru de Turón. Por últimu, Muyeres zarren, a les 19h nel Teatru La Llaboral de Xixón, la xira d’Humanes dempués de cinco años.
Tola programación d’equí a los próximos meses pue vese na Axenda de Musicasturiana.com.
Suscríbite a les nuestres novedaes
